Upat ka luhong sakyanan nakonpiska sa Customs

CEBU, Philippines — Upat ka mga gituohang luxury cars ang gisakmit sa Bureau of Customs Port of Cebu human nga nasakpang gipalusot kini.

Matud pa sa report sa BOC Port of Cebu nga gi-post sa ilang Facebook page nga atol sa eksaminasyong gipahigayon Enero 3, 2019 ilang  nakita ang maong mga kargamento. Ang mga luxury cars nga nasakmit mao ang usa ka unit nga Range Rover Evoque, usa ka unit nga Porsche 911, usa ka unit nga Mercedes-Benz ug usa ka Alfa Romeo.

Si BOC Cebu district collector Elvira Cruz nga maoy niaprub sa Alert Order batok sa maong kargamento posible nga mo-issue og Warrant of Seizure and Detention karong Lunes.

Nasayran nga ang maong kargamento gikan sa Japan nga matud pa sa maong post gi-import sa Kylemelan General Merchandise nga adunay address sa Malabon City.

Naabot ang maong kargamento sa Cebu International Port niadtong Disyembre 19, 2018 ubos sa Bill of Lading No. 181206750071.

Ang nakapaduda sa kargamento nga usa lang ka sakyanan nga pang-display ang kargamento apan nasakpan nga upat diay kini ka buok ug dili usa.

Kahinumduman, ang mga smuggled luxury cars nga madakpan sa BOC subay sa bag-ong direktiba sa pangulo dili na isubasta sama sa gihimo kaniadto tungod kay ang mopalit niini mao gihapon ang mga smugglers. Gimando ni Duterte kaniadto nga paligsan sa heavy equipment ang maong luhong sakyanan agi og bahad niadtong mga gustong mag-smuggle niini. (/IBM)(BANATNEWS)