Davide, Magpale ug deparment heads gikiha sa Ombudsman

CEBU, Philippines — Gikiha diha sa buhatan sa Ombudsman si Cebu Governor Hilario Davide, III ug laing lima tungod sa giingong ilegal nga pag-appoint niini kang provincial health officer Dr. Rene Catan ug budget officer Danilo Rodas.

Si kanhi gobernador ug karon Kongresista Gwendolyn Garcia nagkanayon nga si Davide ug ubang mga kauban niini  gipasakaan og kasong anti-graft, grave misconduct ug conduct prejudicial to the best interest of the service.

Matud ni Garcia nga bisan wala pa mabakante ang posisyon nila ni Dr. Cristina Giango isip health officer ug Emme Gingoyon isip budget officer gipahulipan na kini ni Davide kang Catan ug Rodas.

Laing gikiha mao sila si Bise Gobernador Agnes Magpale, provincial administrator Mark Tolentino, human resource and management officer Bonifer Nacorda, Catan ug Rodas.

Giingong niadtong tuig 2015 ang Ombudsman nimando sa pagpalagbo sa serbisyo nila ni Giango ug Gingoyon kalabotan sa kontrobersiyal nga katukuran sa Cebu International Convention Center (CICC).

Si Giango ug Gingoyon niadtong higayon mga miyembro sa Bids and Awards Committee sa probinsiya ug giingong nasuta sa Ombudsman nga guilty ang duha sa grave misconduct ug gross neglect of duty gawas kang Glen Baricuatro kinsa niluwat sa iyang katungdanan.

Si Garcia nagkanayon nga ang gibuhat nila ni Davide kalapasan kini sa balaod.

Si Giango ug Gingoyon niapelar kini ngadto sa Court of Appeals ug niadtong tuig 2017 ang CA nimando sa pagpabalik sa pwesto sa nahisgutang mga department head.

Matud sa CA nga dili grave misconduct apan simple misconduct lang ang nahimong kalapasan sa nahisgutang department heads diin tulo ka buwan lang nga suspension niini isip silot.

Matud ni Garcia nga  si Giango na-reinstate kini sa serbisyo apan wala mag-function diha sa PHO samtang si Gingoyon giingong nagpadayon nga wala mabalik sa serbisyo.

Si Garcia nihangyo sa buhatan sa Ombudsman nga ipaubos sa preventive suspension si Davide ug ang laing lima samtang nagpadayon ang imbestigasyon sa kaso batok kanila.

Gihangyo usab ni Garcia nga ang Ombudsman sa Quezon City ang mopahigayon sa imbestigasyon. (/BDB)(BANATNEWS)