Angkas, habalhabal dakpon gihapon

CEBU, Philippines — Panakpon gihapon sa kapulisan ang tanang kolorum nga pangpubliko nga sakyanan sama sa habalhabal ug Angkas bisan pa man sa suporta nga gipadayag ni Cebu City Mayor Tomas Osmeña kanila.

Ang direktor sa Cebu City Police Office nga si Senior Superintendent Royina Garma miingon dili matapos sa two-day nga synchronized enhanced managing operations o (SEMPO) ang ilang pagpanakop.

Kalapasan sa Republic Act 4136 or the Traffic Code of the Philippines ang usa sa gitutukan sa SEMPO.

Sulod sa duha ka adlaw niadtong Disyembre 27 hangtod 28, miabot 49 ka tawo ang naisyuhan og Temporary Operator’s Permit o (TOP) nga mokantidad sa P6000 matag usa, samtang 21 sa kolorum ug unom ang na impound nga motor tungod sa kakuwangon sa mga papeles.

Ang maong pagpanakop pinasubay kini sa desisyon sa Korte Suprema sa pagisyu og temporary restraining order (TRO) sa nauna nga desisyon sa lower court nga nagtugot sa paggamit sa motorsiklo isip public transport.

Ang maong desisyon nagmando sa kapolisan ug sa mga sakop sa Land Transportation Franchising and Regulatory Board sa pagdakop sa mga Angkas nga motorsiklo.

Miapilar ang Angkas sa opisyal nila nga press statement nga adunay 25,000 ka Angkas driver ang mawagtangan og panginabuhi tungod niini.

Usa ka drayber sa Angkas nga nahinabi sa Banat News ug di buot magpahingalan miingon nga tagotago na karon ang ilang pagpamasahero.

“Wala na mi mag-uniform lang. Tago-tago mi mura mi og kriminal. Kung di sad mi mamasahero asa man sad mi mangita og ipakaon sa among pamilya?,” sigon pa niini.

Apan si Garma miinsistir nga illegal pa gihapon kini nga matang sa pamasahero. Kini bisan pa man adunay bendisyon ni Osmeña ang ilang pagpamasahero dinhi sa siyudad.

Nasayran nga si Osmeña mipadayag og suporta sa mga apektadong drayber ug migahin pa gani ang siyudad og P15 milyones nga pundo alang 6,500 ka rehistradong Angkas ug habalhabal drivers sa siyudad.

Apan ang mga kritiko sa mayor nagduda sa iyang motibo tungod kay hapit na ang eleksyon ug buot kining magpasubli sa katungdanan.

“I think the wisdom in passing the law na bawal ang habalhabal is because of safety and general welfare of the public. Hindi lang economic progress ang i-consider. It also has to value the lives, and general welfare, lives are more important than economic reasons to justify the presence, or for tolerating habalhabal in the city,” sigon pa ni Garma.

Ang Trafic Patrol Group ang gitahasan sa pagtabang panakop sa kolorum diin mihatag na pud ang CCPO og dugang tawo.

Giklaro ni Garma nga isip law enforcer, usa lang kini sa iyang trabaho.

“Law enforcer lang kami we don’t make laws. Gawin nila munang legal. Nandiyan pa naman ang batas wala silang magagawa,” asoy pa niya. (/IBM)(BANATNEWS)