Durugista nag-unay

CEBU, Philippines — Patay ang usa ka gipasanginlang durugista human siya gipusil sa laing durugista ug nakapagan pa og babaye ingon man 5-anyos nga bata diha sa Sitio Rattan, Barangay Tanke sa Dakbayan sa Talisay niadtong Sabado sa alas 3:30 sa hapon.

Ang namatay mao si Rhen Balquin, 26, nagpuyo sa maong dapit.  Samtang ang napagan mao sila si Arlene Balquin, 31, ug ang 5-anyos nga batang babaye.

Ang namusil kanila nailhan nga si Clifford Salibay nagpuyo sab sa maong dapit.

Sumala pa ni Chief Insp. Ardeolito Cabagnot, deputy chief sa Talisay City Police Station pulos notadong tigbaligya og drugas sa maong dapit sila si Salibay ug si Balquin.

Sa gihimong imbestigasyon human sa maong kaso, nasuta nga managkompetinsya ang duha sa negosyo diha sa maong dapit. Matud pa ang kompetisyon tali sa duha niresulta sa dinumtanay.

Nahitabo ang pagpamusil sa dihang gipasingitan ni Salibay sa dihang naagi kini sa iyang dapit si Balquin. Matud pa nga giitsahan niini og pabuto si Balquin nga gikasuko sa naulahi ug gikomprontase kini.

Si Balquin buot untang mopauli aron mokuha sa iyang armas apan wala na siya gipapauli ni Salibay kay giunhan na kini sa pagpusil. Nisuway sa pagikyas si Balquin apan wala kini lung-i ni Salibay kinsa padayon sa pagpusil kaniya hinungdan nga naigo sa tuhod ang kabanay ni Balquin nga si Arlene ug naigo sab sa kilid sa lawas ang batang babaye nga nagduwa lang sa maong lugar.

Wala magdugay naigo sab si Balquin diha sa iyang dughan apan nakadagan pa gihapon kini palayo sa suspetsado apan nahagba ra gihapon sa unahan.

Gisuwayan siya sa pagtabang apan nakabsan gyud sa iyang kinabuhi.

Si Cabagnot niingon nga luwas na sa makuyaw nga kahimtang si Arlene apan naa pa gihapon sa kritikal nga kahimtang ang batang babaye.

Ang mga nirespondeng polis pakyas sa pagrekober og  basiyo sa mga bala diha sa crime scene.

Gituohang revolver ang gigamit nga armas ni Salibay kinsa wala na maabti sa mga mirespondeng polis. (BANAT NEWS)