Unom patay, 17 sikop didto sa Negros Oriental
CEBU, Philippines — Unom patay ug 17 ang nasikop sa dungan nga pagpatuman sa mga search warrants batok niadtong gidudahang nagtip-ig og illegal nga armas sa Negros Oriental. Sa 17 ka dinakpan, tulo niini ang babaye samtang duha ang lokal nga opisyal.
Nailhan ang mga namatay nga sila si Reneboy Fat, Jaime Revilla, ug Demetrio Fat pulos taga Barangay Hilatan, Guihulngan City Negros Oriental;
Ug Dondon Isugan sa Barangay Buenavista, Guihulngan City; Jun Cabul sa Barangay Trinidad, Guihulngan City, ingon man si Constancio Languita sa Barangay Kabukalan, Sta. Catalina, Negros Oriental.
Samtang ang usa sa lokal nga opisyal nga si Erlinda Tacpao ang mi-surrender, nadakpan usab ang presidente sa Association of Barangay Councilors sa Guihulngan nga si Melbourne Bustamante.
Sigon pa ni Police Senior Superintendent Raul Tacaca, ang provincial director sa Negros Oriental Provincial Police Office sa Banat News/ The Freeman nga unang nibunot sa ilang armas ang mga napatay sa dihang gihatud nila ang search warrants tungod sa paglapas sa Republic Act 10591.
“Bumunot sila ng baril as our operatives are approaching to serve the warrant kaya walang nagawa at mag-retaliate in defense, lahat ay legitimate operations,” sigon pa ni Tacaca.
Sa pagkakaron padayon ang gipahigayon nga imbestigasyon sa pagsusi sa background sa mga namatay og kung aduna ba silay kalambigitan sa New People’s Army. Apan gihingusgan hinuon ni Tacaca nga dili ni alang sa NPA lang. Og dili pud ni bawos sa pagpusil patay kang Senior Inspector Porferio Gabuya Jr., diin napasanginlan ang NPA nga mao nipaluyo.
Si Police Regional Office Central Visayas director Chief Superintendent Debold Sinas miklaro nga wala kini nagpasabot nga ilang gitutokan ang Guihulngan tungod sa pagkapatay kang Gabuya.
Matud niya apil ang Guihulngan sa election watchlist tungod sa presensya sa armadong rebelde. (/IBM)(BANATNEWS)
- Latest
