Katawhan giawhag nga magpasalamat kanunay

CEBU, Philippines — Ang katawhan giawhag nga kanunay  nga magpasalamaton sa Ginoo tungod kay kini ang dakong paglaom sa tanang pagsulay.

Kini ang unod sa wali ni Padre Mike Fortich, kura paruko sa St. Catherine de Alexandria Parish sa Dakbayan sa Carcar atol sa ikapito nga adlaw sa Misa de Gallo.

Matud pa ni Fortich nga dili ikalimod ang tagsa-tagsa ka mga banay karong panahona gihulga sa daghang pagsulay nga gustong moguba sa kabanayan apan masaligon siya kay anaa man ang presensiya sa Ginoo diha sa kinabuhi sa tawo.

Si Fortich nagkanayon nga angay magpasalamat kanunay ang katawhan sa Ginoo tungod kay kini ang dakong paglaom aron makalahutay sa daghan mga pagsulay sa banay

Ang presensiya sa Ginoo sa inadlaw-adlaw nga kinabuhi maoy labing importante tungod kay kawang lang ang paningkamot kung wala ubani sa presensiya sa Ginoo.

Giawhag usab ni Fortich ang mga ginikanan nga dili lang ang ilang presensiya ang gikinahanglan sa mga batan-on apan lakip usab ang pagkukabildo ug pagkumustahay. (/BDB)(BANATNEWS)