Tomas pabor sa resour ce center sa Kapitolyo

CEBU, Philippines — Gihangyo ni Kongresista Gwendolyn Garcia sa ikatulong distrito ang National Historical Commission of the Philippines (NHCP) nga moisyu og cease and desist order kalabot sa P1.3 billion nga resource center project sa Kapitolyo.

Sa iyang suwat niadtong December 12 ngadto ni NHCP chairman Dr. Rene Escalante nagkanayon  si Garcia nga ang 20-storey building makaapekto sa cultural property sa probinsiya.

Gipahinumduman ni Garcia si Escalante nga si Cebu Governor Hilario Davide,III ug iyang opisyales wala gihapon mosanong sa awhag sa NHCP nga mosumiter og bag-ong development plan una sugdan ang maong project.

Sa pagkakaron, ang provincial board wala pa makapagawas og final nga desisyon sa pending nga resolution nga naghatag og pagtugot kang Davide sa pagpirma sa kontrata tali sa WT Construction.

Si Bise Gobernador Agnes Magpale nagkanayon nga ang board mag-deliberate sa maong pending resolution karong Enero 21 nga maoy adlaw nga mo-resume sila sa session sunod tuig.

Sa laing bahin, nisuporta si Mayor Tomas Osmeña sa pagtukod sa maong building tungod kay ang maong building makatabang sa pagpahapsay sa kasamok nga trapiko sa siyudad.

Matud ni Osmeña nga ang maong building itukod sa lugar diin mo-agi ang mga buses sa Bus Rapid Transit.

Dugang ni Osmeña nga ang 21-kilometer BRT route mo-agi gikan N. Bacalso Avenue, South Road Property, Osmeña Boulevard, N. Escario Street ug Governor Cuenco Avenue.

Ug kong  epektibo ang mass transport system ang mga trabahante sa maong building dili na magdala og sakyanan ug mosakay nalang kini sa BRT. (/BDB)(BANATNEWS)