Opisyales sa barangay sa Talisay nabalaka sa seguridad

CEBU, Philippines — Pipila ka opisyales sa barangay sa Siyudad sa Talisay ang nabalaka sa ilang seguridad tungod sa pagsige nila og pirma sa imbentaryo labot sa mga dakop sa kapolisan sa ilang operasyon batok sa ilegal nga drugas.

Usa ka opisyal kinsa nagdumili sa pagpabutyag sa pangalan nagkanayon nga matag adunay dakop ang kapolisan sa siyudad siya ang madali-dali nga masangpit aron mapirmahan ang imbentaryo nga mao usab ang kinahanglanon aron nga mapasaka ang kaso batok sa suspetsadong nadakpan.

Matud sa maong opisyal nga sukad nga nagsige siya og pirma adunay tawo nga nisulti kaniya nga “maghinay-hinay lang”.

Gibutyag sa opisyal nga wala siya kasabot sa iyang gibati sa dihang gipasumbingayan siya sa tawo nga dili niya kaila.

Iyang gitug-an ang iyang kabalaka ngadto sa iyang mga kauban diin lakip usab sila nga nakapirma gibati usab ang kabalaka.

Ang maong mga opisyal nipadayag sa ilang kabalaka ngadto sa polis sa barangay aron mapaabot kini ngadto sa labaw sa kapolisan ug masabotan ang angay nilang buhaton.

Nunot niini, si Superintendent Marlu Conag, hepe sa kapolisan sa siyudad nagkanayon nga apil kini sa risgo sa mga opisyal sa barangay tungod sa pakiggubat sa ginadiling drugas.

Gipahimangnoan ni Conag ang mga opisyal ug iyang mga sakop nga sa dili pa mopirma sa imbentaryo pasabton ang dinakpan nga walay labot ang mga opisyal sa barangay sa dakop tungod kay igo lang sila nga mopirma sa imbentaryo. Dugang ni Conag nga kon adunay mga hulga nga madawat ang mga opisyal sa barangay modangop kini diha sa ilang buhatan aron ilang matun-an ang pagpakgang niini. (/BDB)(BANATNEWS)