Pasaherong Police gilusad sa MCPO

CEBU, Philippines — Gipaniguro sa kapolisan sa Mandaue City  Police Office (MCPO ) ang kaluwasan  sa mga pasahero nga mobiyahe sa amihanang bahin sa Lalawigan sa Sugbo hinungdan ilang gilusad kagahapon sa buntag ang “Pasaherong Polis”.

Nunot sa paglusad sa maong prorgama, ang direktor sa MCPO Police Senior Superintendent Julian Entoma nangulo sa pagsusi sa sitwasyon diha sa Cebu North Bus Terminal sa Barangay Subangdaku lakip na ang kahimtang sa pagsakay sa mga pasahero.

Kagahapon nabantayan nga nidagsa na ang mga pasahero diha sa terminal nga manguli ngadto sa ilang mga lugar sa amihanan.

Ang kapolisan nihatag og mga flyer ngadto sa mga pasahero alang sa safety  tips sa ilang pagsakay ug batok sa mga dautang elemento. Gawas sa maong mga flyer namulong si Entoma ngadto sa mga pasahero ug drayber diin iyaha kining gipahimangnoan sa paglikay sa aksidente ug krimen.

Gibutyag ni Entoma nga sa mga nagbiyahe nga mga sakyanang pasaheroan o mga PUJ ilang mamatikdan ang kinalit nga pagsakay sa police personnel nga nag-uniporme ubos sa ilang gilusad nga “Pasaherong Polis”.

Gipasabot ni Entoma nga kini pagahimuon diha sa matag police station pinaagi sa buddy-buddy system ug pasundan usab kini og mga sakop sa tactical motor riding unit aron dili usab masugamak sa kadaot ang kaluwasan sa misakay nga mga polis ug mga pasahero. (/BDB)(BANATNEWS)