Pag-renew sa business permit anha na unya sa online
CEBU, Philippines — Ang mga magpapatigayon sa Dakbayan sa Sugbo mahimo na unya nga moproseso sa bayad sa ilang business permit diha sa online sugod sa buwan sa Enero sunod tuig.
Kini human ang kagamhanan sa Siyudad sa Sugbo nakig-alayon sa Land Bank of the Philippines alang sa online payment.
Si Annabeth Cuizon, assistant city administrator nibutyag nga adunay giumol karon nga programa ang siyudad uban sa Land Bank kabahin sa online nga pagbayad sa business permits diin ang mga magpapatigayon bisan asang dapita sa Pilipinas pweding maka-renew sa ilang business permit.
Base sa ilang nasabutan ang mga kliyente sa LBP mobayad lang og dugang P10 aron maka-online payment ug dunay cut off sa pagbayad hangtud lang sa alas 6:00 sa gabii.
Samtang ang kadtong kliyente sa laing mga bangko P20 ang ilang additional fee.
Gikatakda nga sa sunod tuig nila ilusad ang maong programa ug posibleng sa tunga-tungang bahin sa buwan sa Enero.
Matud ni Cuizon nga makatabang kini sa mga magpapatigayon diin makadaginot sila og oras niini.
Gipadayag ni Cuizon nga tumong sa maong programa nga matabangan ang mga magpapatigayon nga dili kini maglisod sa pagbayad sa ilang buhis.
Matud usab ni Cuizon nga daghan silang nadawat nga reklamo lakip na niini nga maglisod og parking sa ilang mga sakyanan nga mga magbayad og buhis.
Dugang niini, ang siyudad ug LBP giingong nagpirmahanay na og memorandum of agreement (MOA) kabahin sa proyekto diin ang pagtrabaho na lang sa technical ang giatiman. (/BDB)(BANATNEWS)
- Latest
