LPA masinati sa Sugbo
CEBU, Philippines — Nakasulod na sa Philippine Area of Responsibility (PAR) kagahapon sa kaadlawon ang low pressure area sa silangang bahin sa Mindanao sumala pa sa PAGASA. Mao kini ang hinungdan sa nasinating walay hunong nga pag-ulan sugod sayo sa buntag hangtud sa hapon kagahapon.
Gipaabot nga makasinati og pagulan-ulan dinhi sa Sugbu sumala pa sa Philippine Atmospheric, Geophysical and Astronomical Services Administration (PAGASA) Mactan.
Tungod niini, ang mga nagkadaiyang LGUs mialerto na sa ilang mga disaster managers aron mamenusan ang kadaot nga posibleng mamahimong epekto niini gikan sa mga pagbaha ug pagdahili sa yuta.
Si PAGASA-Visayas chief Alfredo Quiblat, Jr. miingon nga kining nasinating mga pag-ulan dinhi sa Sugbu epekto kini sa LPA sa sidlakang bahin sa Surigao del Sur kagahapon. Gipaabot hinuon nga samtang magdagan ang mga adlaw, magkaanam og kahinay ang pag-ulan.
Matud niya, ang pagirog sa LPA naapektahan usab sa hanging amihan. Sumala pa niya, niadtong Miyerkules sa gabii nisulod sa PAR ang LPA apan nigawas ug nibalik kini og sulod kagahapon sa kaadlawon.
Tungod usab sa amihan ubos kaayo ang kahigayonan nga mamahimo kining usa ka bagyo ug makatugpa sa kayutaan.
Kagahapong adlawa, ang Provincial Disaster Risk Reduction and Management Office sa Sugbu miisa dayon sa blue alert status aron mangandam sa tanang gamitonon ug mga responders.
Subay niini ang Cebu City Disaster Risk Reduction Management Office(CCDRRMO) pinaagi ni Nagiel Bañacia mipahimangno sa mga mag-motorsiklo nga mogamit og raincoats nga magbantay nga dili kaunon sa kadena o kaha sa rayos sa motorsiklo ang ilang proteksyon aron dili madisgrasya. Sa mga motambong sab og Christmas Party si Bañacia miasoy nga maghinay sa pagpadagan tungod kay ang dalan dangog. Gipahibawo ni Bañacia nga daghan sila og girespondehan nga aksidente sa dalan gumikan sa maong mga panghitabo.
Kagahapong adlawa, nasinati usab sa Dakbayan sa Mandaue ang mga pagbaha tungod sa pagbunok sa ulan hinungdan sa nasinating traffic ug naglisod sa pagsakay ang mga pasahero. (Romeo T. Limpangog ug report sa The Freeman/IBM)(BANATNEWS)
- Latest