Seguridad sa Cebu South Bus Terminal pahugtan

CEBU, Philippines – Sugod karong Biyernes, mga sakop sa kapolisan ug militar ang tahasan sa pagbantay sa Cebu South Bus Terminal isip kabahin sa ilang pagpahugot sa seguridad sa maong terminal ilabi na nga daghan ang manguliay karon nga nagsingabot na ang adlaw sa pasko.

Si  Jonathan "Joy" Tumulak, ang manager sa CSBT, nagkanayon nga sa pagkakaron, aduna nay mga military ug police nga nagpahigayon og inspeksyon sa terminal, apan sa mga mosunod nga adlaw modaghan pa ang law enforcement personnel sanglit gipaabot man nga mas mobaga ang mga gidaghanon sa mga pasahero.

Matod ni Tumulak nga sugod karong Biyernes, adunay i-augment nga mga empleyado sa Kapitolyo nga motabang sa pag-assist sa mga pasahero.

Si Tumulak niawhag sa mga pasahero hilabina ang wala nay kalihokan o transaskyon sa syudad nga mas maayo sayo mopauli ug dili mopaabot ug dungan sa pagdasok sa ubang pasahero.

Pag-abot sa mga bus, giawhag usab ni Tumulak ang mga bus operators nga kon mamahimo adunay dugang drayber nga andam morelibo sa kauban. "Kay kung pananglitan, okay pa ang bus makabyahe pa unya ang driver naka tulo na og driver, at least naay morelibo, mopuli" matod ni Tumulak.

Dugang niya kung ugaling man nga mag kulang gyud ang bus, ilang awhagon ang mga LGUs nga mopadala sa ilang mga bus nga maoy mohakot sa mga pasahero ngadto sa ilang tagsa tagsa ka lugar sama sa nahitabo niadtong panahon sa kalag-kalag.

Si Tumulak nagkanayon nga sama sa niaging peak season, susama ra gihapon ang sistema nga ipatuman sa CSBT diin kon puno ang sa sulod sa terminal dili na pasudlon ang mga taxi samtang ang mga pasahero adto magpaabot sa atubangan nga bahin sa terminal kon diin adunay tulda nga ibutang. —/LPM (BANAT NEWS)