Habal-habal driver gipusil patay

CEBU, Philippines – Patay ang usa ka habal-habal  driver  human pusila  sa riding-in-tandem niadtong Martes sa gabii diha sa Sitio  Dungoan, Barangay Basak,  Dakbayan sa Mandaue.

Si Police Senior Inspector  Rodgene Fudotan, hepe sa Presinto  3  sa Mandaue City  Police Office (MCPO) niila sa biktima nga si Freddie  Canoy, hingkod ang panuigon, nagpuyo sa maong  dapit.

Matud ni Fudotan nga naghatod og pasahero ang biktima ug dihang nanaog na ang sakay niini nitunga ang duha ka tawo nga nagsakay og motorsiklo.

Ang angkas  nga nagdali nga nihulbot sa giluklok niining armas ug dayong pusil sa ulo sa biktima ug dihang nahagba na kini giusban pa sa pagpusil.

Human sa maong insidente dali nga nibiya ang mga kriminal ug wala na maabti sa mga polis nga nitubag sa alarma.

Nasayran sa kapolisan nga gawas sa iyang pagkahabal-habal driver ang biktima nagtrabaho usab kini isip panday. (Romeo T. Limpangog ug Nichole Alexis A. Abas /BDB)(BANAT NEWS)