Kapolisan nangayo og giya kang Palma

CEBU, Philippines – Ang kapolisan sa rehiyon siete mihangyo kang Cebu Archbishop Jose Palma nga lamdagan sila aron mosunod sa saktong agianan.

Si Police Chief Superintendent Debold Sinas, direktor sa Police Regional Office-7 miingon nga ila kining paagi aron mapalig-on ang ilang pagsalig sa Ginoo pinaagi sa misa og pagkumpisal.

“Gihangyo namo nga regular mi niya i-guide and call our attention if napaling na mi gamay. Guide us nga dili mi masaag og lain nga dalan,” sigon pa ni Sinas.

Ang arsobispo misaulog og misa sa ikaduha nga adlaw sa Misa de Gallo sa kampo sa PRO-7.

Kini nagpamatuod nga maayo ang relasyon tali sa simbahan ug sa kapolisan, bisan pa man sa mga isyu bahin sa sunod-sunod nga pagpatay nga gikondenar sa simbahan.

Sigon pa niya, nga aduna say suhestiyon ang simbahan nga mopadala og pari gikan sa Basilica Minore del Sto. Niño aron mao ang mosaulog sa misa sulod sa kampo.

“Ang purpose ni archbishop is para makadungog og lain nga idea among tawo, and ang kaparian ma-immerse pud sa kapolisan,”butyag ni Sinas.  (/DILT)(BANAT NEWS)