Piston nabalaka sa 40 ka modernong PUV

CEBU, Philippines – Mokabat sa 50 ka mga drayber sa jeep de pasaheruan nga sakop sa Pagkakaisa ng mga Samahan ng Tsuper at Opereytor Nationwide (PISTON)–Cebu ang naguol nga mogamay ang kita kon magsugod na og dagan ang 40 ka moderno nga Public Utility Vehicles (PUVs)  sa SIyudad sa Sugbo.

Sigon ni PISTON Cebu President Greg Perez nga padayon nilang gibatukan ang modernization program sa gobyerno kay matud pa nga ang mga dagkong korporasyon lang ang makabenepisyo niini.

“Wala man mi’y problema anang mopalambo sa atong transportasyon kay mao na ang kuwang sa atong nasud pero tabangan pud unta sa gobyerno ang mga gagmay nga mga operator ug mga yanong drayber kay dili mi maka-afford anang P2 million sa usa ka unit,” matud niya.

Dugang ni Perez nga adunay 50 ka drayber sa PUJ sa Banawa, Guadalupe, Englis, Apas, Lahug, ug uban pa ang mokunhod ang kita inig sugod ug dagan sa 40 ka PUVs nga gipanag-iya sa Persano Corporation.

Niadtong Lunes, ang Konseho sa Siyudad sa Sugbo mi-aprub sa travel lines nga rota sa 40 ka mga PUVs sa dakbayan.

Ang unang rota maggikan sa Cebu City Hall paingon sa Cebu I.T. Park pinaagi sa Robinsons Galleria Cebu-Cebu Business Park ug vice versa.

Ang ikaduhang rota maggikan sa R. Duterte St. paingon sa Sykes via Happy Valley-Fuente Osmeña-Ramos St.-D. Jakosalem St.-Cebu Business Park ug vice versa. Sa usa ka rota, adunay 20 ka mga units ang magdagan.

Una nang miingon silang Konsehal Eugenio Gabuya, Jr. ug David Tumulak nga walay maligsan sa mga kasamtangang rota sa PUJs kay ang serbisyohan sa modernong PUVs walay rota sa mga PUJs.

Apan matud ni Perez nga kining mga e-buses modagan sab sa mga rota diin aduna nay mga PUJs.

“Kami sa PISTON, padayon sab among hangyo sa among 500 ka miyembro nga paninduton sab ilang mga units ug ipa-rehabilitate nila para manakay gihapon ang mga tawo namo,” dugang niya.

Gibutyag ni Cebu City Transportation Office operations chief Francisco Ouano nga hatagan nila og 45 ka adlaw nga probation period ang maong mga modernong PUVs aron ma-assess kon maayo raba ang operasyon niini. (/DILT)(BANAT NEWS)