Mag-illegal parking sitahon sa Minglanilla
CEBU, Philippines — Istrikto nga ipatuman sugod karong adlawa sa kapolisan sa Lungsod sa Minglanilla ug enforcers ang lagda sa balaud alang sa trapiko.
Nahimo ang maong lakang human sa ilang panagtigom sa Provincial Traffic Managment uban ang mga traffic management group sa ubang lokal nga kagamhanan.
Si Police Chief Insp. Verniño Noserale, hepe sa kapolisan sa Minglanilla mitataw nga una nilang gisabot mao ang mga negosyante sa ilang lugar diin ang ilang mga produkto anha na ipa-deliver sugod sa alas 10 sa gabii hangtud na sa kadlawon.
Ila kining gisuwayan kay ila mang nakita nga kon magdeliver sa adlawan, moparada man ang mga delivery truck sa daplin sa karsada nga makatampo na sa kahuot sa trapiko.
Samtang ang iyang mga polis, ipahimutang sa kadalanan uban ang mga traffic enforcers aron ang kadtong magpataka og parada masita dayon.
Si Noserale nagkanayon nga dili sila gusto nga masubli ang panghitabo sa miaging tuig diin ang taas nga kutay sa trapiko nagsugod sa Dakbayan sa Carcar hangtud na kini sa Siyudad sa Sugbo.
Asoy pa niya nga ilang nahibaw-an nga daghang rason kun nganong ingon ato ang sitwasyon sa mga sakyanan.
Una mao ang pagtumaw sa bagyo, ikaduha mao ang panagbangga sa mga sakyanan ug ang ikatulo mao nga dungan ang mga sakyanan nga anaa sa karsada.
Hangyo lang ni Noserale nga unta mosunod lang ang mga motorista sa ilang ipatuman nga lagda aron hapsay ang pagbiyahe. (/DILT)(BANATNEWS)
- Latest