Mga armas nga gipanag-iya sa kagamhanan ipatahan

CEBU, Philippines — Gumikan sa gipahibalo sa Police Regional Office (PRO)-7 ug COMELEC nga nalakip ang Dakbayan sa Mandaue nga gipaubos sa Election Watchlist Areas (EWAs)  uban sa pipila pa ka mga lugar sa Sugbo, gihimong lakang karon sa kagamhanang lokal sa Mandaue ang pagpa-uli sa tanang armas nga gipanag-iya sa siyudad ug ipatugyan kini ngadto sa buhatan sa Department of  General  Services (GDS)  alang sa inventory.

Ang maong memorandum nga giluwatan ni Mayor Luigi Quisumbing nagtumong ngadto sa mga barangay kapitan ug department heads nga nagbaton og armas nga gipanag-iya sa kagamhanan.

Hinuon gitataw ni Mayor Quisumbing nga ang maong memorandum, wala maglakip sa mga sakop sa Mandaue City Police Office.

Matud sa mayor nga human himoong inventory sa mga armas, itahan usab  sa GDS ngadto sa MCPO alang sa safe keeping.

Gitataw sa mayor nga kadtong dili makatahan sa armas, moresulta kini sa pagkanselar sa acknowledgement receipt ug ang padayon nga paghupot niini maisip na nga ilegal.

Sa nasayran, ang COMELEC miila sa 29 ka mga lungsod ug dakbayan sa Central Visayas ubos sa EWAs. Buot pasabot, ipaubos ang maong mga lugar sa mas hugot nga pagbantay sa kapolisan.

Gitataw hinuon ni PSSupt. Julian Entoma, direktor sa MCPO nga ang paglakip sa  Mandaue sa EWAs, pagsiguro lang kini sa hapsay ug malinawon nga 2019 midterm elections. (/DILT)(BANATNEWS)