Mga heritage sites sa kalungsoran pauswagon sa probinsiya

CEBU, Philippines — Mopahigayon og heritage caravan ang Probinsiya sa Sugbo pinaagi sa Provincial Tourism Office ngadto sa nagkadaiyang lungsod ug dakbayan sa lalawigan sunod tuig.

Si Joselito “Boboi” Costas, pangulo sa PTO nagkanayon nga pauswagon nila ang awareness sa kalungsuran ug sa mga buhaton sa heritage o mga kabilin sa ilang lugar.

Subay kini sa plano sa provincial tourism pag-ila sa mga lungsod ug dakbayan nga mamahimo nga pilot area sa pag-develop nila sa nagkadaiyang turismo, sama sa faith based tourism, culinary tourism, culture, eco-tourism ug adventure tourism.

Matud ni Costas nga wala pa silay naila nga mga lungsod ug dakbayan diin ipatuman ang maong klase sa tourism nga mamahimong agakon sa PTO.

Usa sa mga prioridad nga i-develop sa PTO mao ang sa Kinatarcan Island sa lungsod sa Sta. Fe isla sa Bantayan diin adunay property sa maong lugar nga gipanag-iya sa Probinsya sa Sugbo.

Dugang ni Costas nga plano niya nga i-develop ang maong destinasyon sa usa ka geo-tourism destination tungod sa rock formation sa maong dapit. (/BDB)(BANATNEWS)