Bus ug truck nagbangga, 12 angol

CEBU, Philippines — Naangol ang dose ka tawo dihang nagbangga ang usa ka public utility bus (PUB) ug dump truck sa may national highway habig sa Barangay Pangdan, City of Naga, alas singko y media sa buntag kagahapon.

Ang Calvo bus gimaneho ni Rammel Villaver, 45-anyos, minyo taga Brgy. Matab-ang, Toledo City, samtang ang dump truck gidrayban ni Leonardo Lasan, taga Toledo sab.

Nailhan ang mga nangaangol nga sila si Carlos Basak, taga Arpili, Balamban, Enrico Jumawan, taga V. Rama, Cebu City, Mickey Lastima, taga Toledo City, Paul Paran, taga Toledo City, Raul Caburnay, Eladio Parame, taga City of Naga, Ma. Lourdes Garcia, taga Bato, Toledo City, Banjamin Barbadillo, taga Brgy. Talavera, Toledo City, Jennifer dela Torre, taga Toledo City ug Raul Bertudio, taga Toledo.

Matud ni PO1 Clifford Ian Sanchez, desk officer sa City of Naga Police Station, nga base sa inisyal nga pakisusi sa iyang mga kauban nga duha ka mga sakyanan nagbiyahe sa managlahi nga direksyon. Paingon sa amihanan ang bus samtang paingon sa Toledo ang dump truck.

Giingong pag-abot sa lugar nahitaboan, giingong mi-overtake ang drayber sa truck nga si Lasan, apan pakyas kining nakabalik sa iyang linya, hinungdan nga aksidente niining naigo ang bus nga gimaneho ni Villaver.

Gumikan sa hitabo, midasmag usab ang dump truck sa panimalay ni Parame, kinsa naangol sa maong insidente.

Human sa hitabo, dali nga gidala sa labing duol nga tambalanan sa Dakbayan sa Naga ang mga biktima, samtang ang drayber nga si Villaver, mitahan ngadto sa kapolisan samtang si Lasan kasamtangan pang nagtagotago sa pagsulat niining balita. -  DILT (BANAT NEWS)