Manindahay og pabuto gikompleto pa ang rekisitos

CEBU, Philippines — Mga manindahay og pabuto makasugod og paninda sa ilang mga produkto karong Disyembre 15 tungod kay gipakompleto pa nila ang tanang rekisitos.

Kagahapon sa buntag ang secretary sa Cebu City Fireworks Association Marivic Cose niadto sa buhatan ni Konsehal Dave Tumulak, chairman sa committee on public order and safety aron pagpangayo og temporary business permit nga usa sa gikinahanglan sa Philippine National Police ug Bureau of Fire and Protection aron sila mahatagan og permit. Matud ni Cose nga karong Disyembre 15 na sila magsugod sa pagpaninda diin 20 ka stall sila ang maninda diha sa fire cracker zone sa South Road Properties.

Ang mga manindahay og pabuto magbayad kini og P20 matag adlaw sa ticket o arkabala ug wala na silay laing bayranan. Gipadayag ni Cose nga nalipay sila niini ug dili usab sila alkanse sukwahi sa niaging tuig dihang didto pa sila sa ilang karaang pwesto diin magbayad sila og P16,000 matag stall. Si Tumulak sa iyang bahin, niklaro nga usa ka private firm nga maoy niabang sa pwesto niadtong higayona ang nangayo og P16 mil nga bayad gikan sa manindahay ug dili ang kagamhanan sa siyudad.

Ang mga manindahay og pabuto tugotan lang nga makabaligya hangtod sa Disyembre 31.  – BDB (BANAT NEWS)