Daghang kabus sa Probinsiya sa Sugbo

CEBU, Philippines – Nag-una ang Lalawigan sa Sugbo nga daghang kabus sa mga rural areas basi sa assessment sa Listahanan 2 gikan 2015 hangtod karong tuiga sa Department of Social Welfare and Development (DSWD-7).

Ang Listahanan usa ka National Household Targeting System ug database diin ang katuyuan niini mao nga mahibaw-an kun kinsa ug asa nagpuyo ang mga labing kabus ug aron sila matabangan.

Basi sa maong listahan, ang Cebu adunay 286,840 ka kabus gikan sa 591,329 nga na-assessed, gisundan kini sa Negros Oriental nga adunay 140,496 gikan sa 244,758, ikatulo ang Bohol nga adunay 100,691 gikan sa 248,246 nga na-assessed, ug katapusan ang Siquijor nga adunay 6,432 gikan sa 20,501 ka households nga na-assessed.

Si Hillton Edrial, regional field coordinator sa Listahanan, miingon nga migamit sila og proxy means test nga usa ka statistical model nga adunay observable ug verifiable indicator.

Dugang ni Edrial nga gisusi nila ang kondisyon sa panimalay, kuhaanan og limpyong tubig, elektrisidad, naabot nga edukasyon, pansayan, ug uban pang mga timailhan.

Migamit usab sila og sukdanan aron sa pagbana-bana nga kita sa matag pamilya.

Kahinumduman nga ang Probinsiya sa Sugbo nagpabilin nga labing datu nga lalawigan sa nasud basi sa 2017 Annual Financial Report sa Commission on Audit (COA).

Ang lalawigan adunay total earnings nga P34.14 bilyones sa 2017 o dul-an P2 bilyones nga taas pa sa 2016 nga kita nga miabot og P32.43 bilyones.

Tumong sa Listahanan nga makapaambit og taas nga kalidad nga database alang sa mamahimong benepisyaryo sa nagkadaiyang programa sama sa Pantawid Pamilyang Pilipino Program (4Ps). - Joevelon G. Pinay/DILT (BANAT NEWS)