11 ka giingong nalambigit sa drugas sikop

CEBU, Philippines – Nadakpan sa gipahigayong checkpoint sa kapolisan ang 11 ka tawo nga giingong nagdala og shabu niadtong Lunes sa gabii ug kagahapon sa kadlawon diha sa Dakbayan sa Mandaue.

Giila ni  Police Officer 3  Jayson  Flores sa  Presinto 1 sa Mandaue City Police Offic ang mga suspetsado nga sila si  Glenn Catarinen, 35, taga Barangay  Subangdaku, Christopher Oyao, 40, taga Barangay  Pajo,  Dakbayan sa Lapu-Lapu.

Laing nasikop si Michael Magat, 53, taga Barangay Pajo,. Dakbayan sa Lapu-Lapu, Joseph Alinton, 26, taga Barangay Babag 2, Dakbayan sa Lapu-Lapu,  Estephane Biton, 27, taga Carcar, Juanito  Guitgano, 20, taga Dakbayan sa Carcar nga nakuhaan usab og duha ka gagmay nga paketeng shabu, tinfoil ug motorsiklo.

Dugang nasikop si Gerson Cosep, 26,  Ramil  Sembrano, 27, taga Barangay  Babag, Dakbayan sa Lapu-Lapu nadakpan usab ug giingong nasakmitan og tulo ka gagmay nga paketeng shabu ug kalibre. 45 nga pistola usab ang nasakmit gikan kang Jovannie  Bernal, 29, taga dalan Jakosalem, Dakbayan sa Sugbo.

Sa imbestigasyon sa kapolisan nasayran nga ang giingong gipalitan og shabu sa mga suspetsado  mao si Jerome Ginus, 36, taga Barangay Tulay, Lungsod sa Minglanilla ug Elmer  Sequebas, 38, taga NFA, Barangay  Lahug,  Dakbayan sa Sugbo.

Kini ang hinungdan nga gihimo dayon sa kapolisan ang buy bust operation nga maoy hinungdan sa pagkasikop nila ni Ginus ug Sequebas ug ang duha nasakmitan og tulo ka medium size nga shabu, usa ka dakong pakete ug P1,000 nga buy bust money. -/BDB (BANAT NEWS)