Napalgang patay, grab drayber diay
CEBU, Philippines — Lalaki nga napalgang patay didto sa kalibuna sa Barangay Langub, bukirang barangay sa lungsod sa Asturias, niadtong Nobiyembre 13 nailhan na nga usa ka Grab driver.
Ang hepe sa kapolisan sa Asturias nga si Chief Inspector Roger Quijano mibutyag nga positibong giila sa kapuyo niini ang biktima nga si Jiboy Delos Reyes ,41, residente sa Barangay Poblacion, Sibonga.
Matud ni Quijano nga niadtong Nobiyembre 13 sa hapon napalgan sa usa ka maguuma ang usa ka patayng lawas sa lalaki nga adunay mga bun-og ug mga samad sa kalawasan. Nagduda sila nga sa laing lugar gipatay ang biktima ug didto ra kini gilabay. Walay nakuha nga mga identification card gikan sa biktima maong wala dayon nila kini mailhi ug paglabay sa pipila ka adlaw nga way ni-claim gipalubong kini sa taga punerarya.
Apan niadtong Sabado, usa ka Marites Alegado, 45, taga Sibonga sab ang naabot sa ilang buhatan ug nagpangutana ug positibo niining giila ang hulagway sa biktima.
Giingong nakontak pa ni Alegado ang biktima niadtong Nobyimbre 12 sa alas kwatro sa hapon apan pagkasunod nga adlaw dili na kini ma contact. Si Delos Reyes giingong drayber sa Grab sa Dakbayan sa Sugbo ug panagsa ra kini mag-ulian didto sa Sibonga.
Sa pagkakaron, gi-alerto na ang mga otoridad sa probinsya ug sa Metro Cebu sa nawala nga Nissan Almera nga sakyanan sa biktima nga adunay plakang OY 2428. (BANAT NEWS)
- Latest