Mga LGUs sa First District giapuran og ambulansiya

CEBU, Philippines — Giapuran og mga ambulansya ang tanang Local Government Unit (LGU) sa unang distrito ubos sa paningkamot ni Kongresista Gerald Anthony “Samsam” Gullas nga gikan sa Department of Health (DOH).

Naabot ang mga ambulansya niadtong miaging semana nga gikalipay ni Gullas tungod kay gipaminaw sa maong ahensya ang iyang hangyo para sa mga taga First District.

Iyang gipasabot nga bisan paman sa nagkalain-lain na nga namunuan sa DOH natagad pa gihapon ang iyang hangyo alang sa iyang mga konstitwente.

“Health is truly one of our priorities when it comes to the 1st district of Cebu,” iyang pagpasabot sa iyang Facebook Page.

Siya nagkanayon nga walo ka ambulansya ang naabot busa iyang tagsaan ang lungsod sa Minglanilla, San Fernando, Sibonga ug Dakbayan sa Naga.

Samtang tag duha ka ambulansya ang sa Syudad sa Talisay ug Carcar nga pulos naay mga district hospitals.

Dugang pa niya nga usa gyud sa iyang prayoridad ang pag-atiman sa panglawas sa mga kabus nga dili makasarang sa pagpatambal sa mahalong tambalanan. (BANAT NEWS)