Inmates nangandoy sa ilang pamilya karong Pasko

CEBU, Philippines — Lakip nga nangandoy nga magmalipayon karong panahon sa Pasko mao ang mga Persons Deprived of Liberty (PDL) o kadtong mga tawong napriso.

Pipila sa mga priso sa Cebu City Jail nga nahinabi sa Banat News ang mihulagway sa Pasko nga panahon sa gugma ug pamilya.

Si Jojo Cabasag, mipadayag nga ang pasko panahon kini sa gugma. Ug kon wala ang gugma dili makalihok ang kalibutan, diin anaa ang Ginoo. Anaa ang pamilya, mga kauban sa bisyo nga nagbag-o ug sa wala pa magbag-o.

Dugang niya nga niining panahona, padayon lang gihapon siya kay sayud siya nga adunay paglaum. Kini bisan paman sa kamingaw nga iyang nabati ngadto sa iyang fiancé ug mga anak. Malaumon siya nga mauli siya sa iyang pamilya atol unya sa Pasko.

Buot niyang ipaabot ang iyang mensahe ngadto sa iyang pamilya nga gihigugma kayo niya kini.

Ang 22-anyos nga si Marj, mipadayag nga importante kaayo ang pamilya kun Pasko kay panahon kini sa pagsadya. Hinungdan nga bisan og wala siya maghandum nga makagawas apan malaumon siya nga adunay mobisita niya nga kabanay karong mga panahona.

Si Marj kinsa dul-an na sa duha ka tuig nga napriso, wala pay bisan usa ka kabanay ang mibisita kaniya.

Pipila usab sa mga PDL ang malaumon nga maayo lang ang ilang panglawas ug adunay mobisita nila nga pamilya panahon sa Pasko diin lami nga pagkaon ang ilang pagasaw-an unya. Si Jail Officer 2 Alex Salutan, inmates welfare officer sa CCJ, mipadayag nga niadtong buwan sa Nobyimbre, pipila ka mga inmates ang mihimo og mga dayan-dayan sa Pasko diin adunay mga mi-order. Ang ilang halin, tua sa mga naghimo ug ngadto sa ilang pamilya.

Dugang sa jail officer nga daku og tabang sa mga PDL ang ilang livelihood program kay napuslan gihapon sila sa ilang pamilya bisan og anaa sila sa sulod sa prisohan. (BANAT NEWS)