“Never Stop Praying”

CEBU, Philippines — Dili matod pa niya mapugngan ang kaugalingon nga mobati gyud ngadto sa mga tawo nga nanginahanglan bisan pa man nga kapila na siya nabinuangan ug nabintahaan. Ug niya pa, ang pagtabang kinahanglan nga kinasing-kasing, ug dili maghuwat og balos gikan sa imong gitabangan.

Siya mao si Ma. Natividad Treveño o mas nailhan sa kadaghanan nga “Nene”, 58 anyos,  taga Talamban, Cebu City ug  tag-iya sa Treveños Arts and Antiques duha sa  A.S. Fortuna, Mandaue City.

Kamagwangan siya sa upat ka managsuon. Wala’y trabaho iyang mga ginikanan ug naninda lang sila og sud-an sa ilang balay didto sa Tres de Abril, Cebu City.

Gipaambit niini nga bata pa lang sila, gibansay na sila sa ilang iyaan nga maninda diin mangumpra sila sa Carbon ug ibaligya didto sa Mabolo.

Nagtungha siya sa San Nicholas Elementary School diin magdala siya og pagkaon sa ilang tunghaan aron ibaligya. Kun wala’y klase, mouban siya sa iyang inahan og suroy og sud-an.

Nipadayon siya og tungha sa San Carlos Girls High. Kay usa man kini ka private school, aduna sila’y P20 nga monthy fees. Magpuli-puli lang matod pa ilang mga iyaan og bayad sa iyang matrikula kay wala may kwarta iyang mga ginikanan. “Ang kita sa karenderia is not enough to feed us. Close me mga relatives mao nitabang sila,”asoy pa niya sa Banat News Tingusbawan.

Apan aduna matod pay higayon nga madugay siya og bayad sa matrikula busa magpromisory note nalang siya aron makakuha og exam.

“I-bully sab ko sauna kay akong sapatos daan, akong uniform kay usa ra kabuok. Makita nila nga pobre raka. But I always turn the negatives into a positive one,”niya pa.

Maninda sab siya og mga candies sa ilang tunghaan aron aduna siya’y pambalon. Hangtod nga nigradwar siya sa hayiskul.

Kay pursigido man siya motungha sa kolehiyo, nangita siya og trabaho. Nagtrabaho siya sa usa ka law firm isip secretary ug nagtungha og kursong BS Secretarial. Alas 8:00 sa buntag hangtod alas 5:00 sa hapon ang iyang duty ug 5:30 sa hapon hangtod alas 9:00 sa gabii ang iyang klase.

Aron aduna siya’y ikapalit og projects, mamaligya siya sa iyang mga kauban og lipstick ug uban pang produkto. Naninda sab siya sa ilang trabahoan og mga sud-an ug mga gamit.

Bisan nga siya na ang nagbayad sa iyang matrikula, motabang gihapon siya sa gastohan sa balay ug pagpatungha sa iyang mga manghod.

Pag-abot niya og second  year college, nibalhin siya og laing kompanya. “Usahay kasab-an ko sa akong amo kay dili ko maka-overtime. Magdali ko pirme gikan sa Talisay to USC para makaabot kos 5:30 nga klase,”niya pa.

Pag fourth year niya nibalhin siya sa usa ka insurance company isip accounting clerk. Bisan sa iyang kabusy niapil pa gyud siya og mga leadership organizations sama sa Philippine Jaycees Inc.

Hangtod nga nigradwar siya sa kolehiyo ug padayon sa trabaho isip accounting clerk. Nitungha sab siya og Master in Business Administration  ug niapil sa Toastmaster International.

Niadtong 1988 nangaplay siya sa usa ka airline company ug nadawat. Nadestino siya sa ground handling department. Dinhi, maninda gihapon siya og sud-an ngadto sa iyang mga kauban. Nagsugod na sab siya og pamaligya og mga alahas, dress, bag, perfume ug uban pa.

“I enjoy working there, coz of the privilege to travel for free. Halos every year ko motravel ug taga adto nako sa usa ka country, mopalit ko’g mga butang nga pwede ibaligya,”asoy pa niya.

Tungod sa iyang patigayon, nakapalit siya og sakyanan ug nakapatukod siya og balay niadtong 1995 sa Talamban. Napatukoran sab niya iyang mga ginikanan og balay. Ug niadtong 1997, nakabaton siya og anak sa usa ka negosyante.

Hangtod nga nakahukom siya nga maninda og mga antique nga butang ug mga home decors. Mga dato ang kasagaran niyang clients ug sa balay lang niya kini papilion sa iyang baligya. Usahay maabtan siya og kadlawon pag-abi-abi  ug di na siya makapahuway.

Busa niadtong 1999, nakahukom siya nga moabli og shop didto sa Banilad. Dinhi na natawo ang Treveños Arts and Antiques. Gibaligya niya uban niyang mga alahas aron iyang ipuhunan. Gamay ra iyang pwesto apan magbayad siya P30,000 matag buwan.

“Matog lang ko’g 30 minutes to one hour in a day. Every day off, I will go to Manila aron mangumpra,”niya pa.

“While I’m working, I keep on investing. I see to it nga every year naa koy mapundar. I don’t compete with anybody, I only compete my own self,”niya pa.

Human sa napulo ka tuig didto sa pwesto sa Banilad, nibalhin siya sulod sa usa ka mall apan pila lang siya ka tuig didto ug nibalhin sa kasamtangan niyang pwesto niadtong 2011.

“We accept made to order furniture, we do interior designing sa mga balay, hotels ug condominiums. We conceptualize what they like; we have a team to do it. We have also retail,”niya pa.

Gawas niana, namaligya sab siya og mga alahas ug insurance. Aduna sab siya’y catering services nga  Café Treveños.

“I treat all my clients as no. 1, as queen & king. So they feel happy coming back. I might have expensive products, but still people come and buy. You deliver what you promise to your suppliers and clients. You should have a “technical know-how”  sa imong negosyo,” niya  pa.

Disiotso na ka tuig ang Treveños Art and Antiques ug daghan na sab kining nadawat nga pasidungog sama sa National Shoppers’ Choice Hall Of Fame Awards sa tuig 2005, 2006 ug 2008.

“Wala koy formal education sa interior design, nakat-on lang ko through experience,”niya pa.

Apan taliwala sa kalamposan, kadaghan sab nga higayon nga nailad siya. Adunay nangutang niya og mga alahas nga nibalor P18-20M ug wala na siya bayri niini. Nabaligya uban niyang properties aron makabangon siya.

Gumikan sa iyang negosyo, nakapatungha siya sa duha niya ka mga anak sa kolehiyo ug nakapalit siya og mga yuta ug balay.

Isip pasalamat sa tanang grasya nga nadawat, kanunay siyang motabang ngadto sa ubang nanginahanglan. Nitabang siya og tukod sa Archdiocesan House didto sa Pagadian ug aduna siya’y gisuportaran karon nga 12 ka mga brothers.

“You share what you have. It is in giving nga mabalikan ra ka. Despite kabuangan ka sa mga tawo, easy lang ka makapasaylo,”asoy pa niya.

Ug ang giisip niyang sekreto sa kalamposan mao ang  pag-ampo kanunay sa Ginoo.

“You should never stop praying everyday, even it’s a failure or success. You have to be witty and smart. You have to work hard. Keep yourself away from toxic people. Give your smile to everybody,”

“Ang importante gyud, you help other people even they will not help you in return. Dali ra ko malooy, I wanted to help other people even at the expense of myself,”pamunto pa niya.

Ug tambag niya ngadto sa uban aron molampos usab mao nga magbaton og pangandoy.

“Never stop dreaming. Do not easily give up. Keep on praying to the Lord. Keep on doing good things to other people.”