Mangingihaw giihaw

CEBU, Philippines — Patay nang napalgan ang usa ka mangingihaw  nga gibinaklid og higot ang mga kamot diha sa Barangay Manipis, Siyudad sa Talisay kagahapon sa buntag.

Ang biktima giila sa iyang iyaan nga si Junel Nacua, 22,  taga Vito, lungsod sa Minglanilla.

Matud pa ni Police Officer 1 Milfred Labitad sa Talisay City Police Station nataud-tauran pa ayha nailhan ang biktima tungod kay wala’y nakaila niya sa lugar.

Si Kapitan Joselito Laurente sa maong barangay maoy nitawag sa kapulisan human nabantayan ang patay’ng lawas sa mga tawong naagi sa lugar.

Si PO1 Labitad niingon nga ang iyaan sa biktima nga si Flor Alipor maoy niila sa namatay.

Sigon pa niya nga nakadungog siya sa balita sa radyo nga aduna’y patikang lalaki nga gipatay nga nakit-an sa maong dapit mao nga nisusi kini sa dapit kay wala pa mauli ang pag-umangkon.

Ang residente sa lugar nitataw nga mga alas 12 ngadto sa ala una sa kaadlawon nakadungog sila og mga buto sa armas. Apan wala lang nila kini panumbalinga tungod kay nabalaka sila kay gabii man ug nianang pagkahayag na ayha pa nila napalgan ang biktima.

Unom ka kabhang sa .45 nga bala ang narekober sa kapulisan didto sa crime scene. Si Labitad niingon nga ila pang paladman ang maong hitabo kun unsa ang background sa biktima.

Ang Minglanilla Police nitataw nga usa ka mangihaway og mananap ang biktima diha sa ilang ihawan.  Gisubay pa nila kon ang biktima drug surrenderer o  kun aduna ba kini mga kaso sa ilang buhatan.(/IBM)(BANATNEWS)