Buy-bust, usa patay

CEBU, Philippines – Lain nasab ang patay samtang upat ka tawo nga gituohang nalambigit sa ginadiling drugas ang nadakpan sa operasyon sa mga sakop sa Provincial Intelligence Branch (PIB) sa Cebu Provincial Police Office (CPPO) didto sa Barangay Jaclupan, Dakbayan sa Talisay kagahapon sa alas 6:30 sa buntag.

Ang napatay nga maoy subject sa buy bust operation nga mao si Junie Macaraya alyas Clay nga taga Sitio Mananga 1, Barangay Tabunok sa maong siyudad.

Samtang ang mga kauban niyang nadakpan mao ang iyang bayaw nga tomboy nga si Engilie Enjaine Cosep, 30, tulo ka mga runners ug tig repack sa ilegal nga drugas nga sila si Eusebio Abalo, 49, Edison Esconas, 34, ug si Edu Manzano, 34, taga Barangay Lawaan 3 sa maong siyudad.

Si Sr. Insp. Alejandro Batobalonos sa PIB nagkanayon nga taud-taod nang gipanid-an si Macaraya hangtud nga ilang nahimo ang ilang operasyon.

Si Macaraya nisuway sa pagkuha sa iyang armas hinungdan nga giunhan nalang sa mga operatiba. Nakuhaan kini og .45 nga armas si Macaraya kinsa daling gidala sa duol nga tambalanan apan gideklarar didto nga patay na.

Sigon pa ni Batobalonos nga nadelikado sila niadtong higayona kay wala dayon nila nabantayan ang tomboy nga niluklok sa luyo sa pultahan.

“Maayo nalang gani kay wala’y armas ang tomboy kay kung wala pa unya mopatay gyud siya, aw way siguro namo madisgrasya,” asoy pa ni Batobalonos.

Nakuha gikan sa mga dinakpan mao ang 10 ka medium nga pakete ug walo ka gagmay nga pakite sa shabu nga nitimbang 53.2 gramos nga nibalor P627, 760.

Laing ebidensya nga nasakmit ang P8 mil nga buy-bust money; P1,600 nga halin sa shabu, timbangan ug drug paraphernalia.

Si Esconas nihimakak nga apil siya sa operasyon sa tulo kay matud niya natulog siya adtong tungora ug gipukaw nalang siya kay gipaadto sa balay nga gipuy-an ni Macaraya apan pag-abot didto gidakop siya.

“Wala tawon koy labot ana oi. Naninda ra intawon ko diri sa sari-sari store namo,” panghimakak usab ni Cosep.

Sugod niadtong adlaw nga Biyernes sa miaging semana sagunson ang mga operasyon sa kapolisan batok sa ilegal nga drugas nga niresulta na sa kamatayon sa unom ka drug personalities ug niadtong Domingo, duha ka retiradong polis usab ang gipatay diha gihapon sa maong siyudad. -/IBM (BANAT NEWS)