Mga mag uuma sa Cebu City gitabangan

CEBU, Philippines — Ang Siyudad sa Sugbo nilusad sa gitawag niining Cebu City Agripreneurs Program” (CCAP) aron pagtabang sa mga maguuma sa siyudad pinaagi sa Cebu City Agriculture Department (CCAD).

Si City Agriculturist Apple Tribunalo mibutyag nga magamit kini sa mga maguuma sa bukirong barangay sa siyudad sa ilang pagbaligya sa ilang mga abot gikan sa umahan sama sa mga utanon.

“Early of 2018, the mayor directed me.  He wants (a) shopping center to buy the products of farmers kay si mayor interested gyud siya sa agriculture. And then I work it out, this is in partnership with the Vicsal foundation,” matud pang Tribunalo.

Ang Vicsal Foundation nga konektado sa Metro Gaisano mao na karon ang giilang tigpalit sa mga produkto sa mga maguuma sa siyudad.

Sa miaging buwan, nagpinirmahay na og Memorandum of Agreement (MOA) ang Vicsal Foundation ug si Cebu City Mayor Tomas Osmeña alang sa maong programa.

Ubos sa kasabotan, ang Gaisano ang mamalit sa mga abot sa mga umahan nga mas ubos og P5 sa presyo sa Carbon Public Market  ug paliton ang ilang produkto matag adlaw nga Martes ug Huwebes.

Ang mga abot umahan gikan sa bukid anha dad-on sa Cebu City Resource Management and Development Center (CREMDEC) sa Barangay Taptap ug diha kini komprahon sa Vicsal Foundation.

Aron mas matabangan ang mga maguuma, ang siyudad motagana og sakyanan nga mohakot sa mga utanon padung sa CREMDEC matag adlaw nga Lunes ug Huwebes.

“Ang system ani is ang Gaisano will have their orders two days before, then ipasa nila sa CCAD because it’s not just kung farmer ka, ma-enter ka. No, they have to enroll (to) this program so that ma-centralized namo ang among kuhaanan,” pasabot pa niya. Sa pagkakaron, 30 na ka maguuma ang nagpalista. (BANAT NEWS)