1,019 negosyo dinhi sa siyudad way permits

CEBU, Philippines —  Sulod sa upat ka buwan nga pag-inspeksyon, nasakpan sa Cebu City Task Force on the Inspection and Investigation of Business Permits nga dunay 1,019 business establishments nga nag-operate bisan og walay business permit sa syudad.

Si Melvin Bacalso, kinsa acting head of the task force, miingon nga duna nay 47 establisamentong nasirad-an tungod wala mi comply sa mga notisya sa siyudad sukad niadtong Agosto 2 ning tuiga kon kanus-a nagsugod ang maong task force sa ilang trabaho.  Sigon ni Bacalso nga naka issue na og 3,842 ka notices ug show cause orders ang task force.

Kahinumduman nga si Mayor Tomas Osmeña mipagawas og executive order nga nag-umol sa task force nga mo-inspeksyon sa tanang establisamento ug mga tindahan  dinhi sa syudad.

Duna nay 11,504 ka mga establisamento ang na inspeksyon gikan sa barangay Camputhaw, Capitol Site, Lahug, Luz, Mabolo, Kasambagan, Apas, Pahina Central, Kalubihan, Banilad, Ermita, Tabunan, Zapatera, Calamba, ug uban pa.

Ang maong programa ang giingong usa sa mga rason nganong misaka ngadto sa 12 percent nga koleksyon sa business taxes ang City Treasurer’s Office.

Matud ni City Treasurer Veronica Morelos nga nakakolekta ang syudad og P2 billion nga business taxes gikan Enero hangtud Oktubre karong tuiga, nga mas dako kompara sa parehong buwan sa miaging tuig nga P1.8 billion.

Gikan Enero hangtod Oktubre karong tuiga, naka kolekta na ang syudad og P5.6 billion gikan sa tanang taxes ug non-taxes revenue.  – IBM, (BANATNEWS)