Dul-an P5 milyong shabu, 30 ka tawo nasikop

CEBU, Philippines —  Mokabat P4.5 Milyones nga gidudahang shabu ang nasakmit sa duha ka managlahing 24-oras nga operasyon kontra illegal nga drugas sa Cebu City, Talisay City, Mandaue City ug Lapu-Lapu City nga niresulta usab sa pagkasikop sa kapin 30 ka mga tawo.

Sa operasyon sa Cebu City Police Office (CCPO) nga gitawag og Synchronized Enhanced Managing Police Operations (SEMPO) sulod sa 24 ka oras, gikan sa adlaw’ng Huwebes.

Ang 30 ka mga tawong gidakop tungod kini sa illegal nga drugas ug ang siyam kanila dunay mga warrant of arrest.

Atol sa maong adlaw 23 ka buy-bust operations ang gihimo ug nakuha didto ang 216 ka buok nga sachet sa gidudahang shabu, diin 202 ang gagmay, 17 ang medium packs nga aduna’y gibug-aton nga 148 kapin nga gramo ug nagkantidad tanan og P1.8 Milyones.

Sigon pa ni Senior Superintendent Royina Garma, nagmalampuson ang ilang SEMPO nga tanan gibase ang impormasyon gikan sa mga tactical interrogations nga ilang gihimo sa mga nauna nang nadakpan nga maoy nitug-an kon asa ug kinsa ang ilang mga koneksyon.

“Hindi naming titigilan talaga ang mga nahuhuli, ‘yun din ang directives ko to the station commanders para talagang maubos na illegal na drugas,” sigon pa ni Garma.

Samtang sayo sa buntag sa Sabado, nadakpan sa kapulisan sa Talisay City ang duha ka tawo nga nakuhaan og 175 gramos nga gidudahang shabu nga mobalor sa kapin P2 milyones  human sa buy-bust operation sa Sitio San Miguel Barangay Linao.

Ang mga suspetsado nailhan nga sila si Jovanie Cabrilos, 28, ug Shera Mae Abatayo, 27, pulos taga Barangay Lawaan 3, Talisay City.  Sigon pa ni Police Superintendent Marlu Conag hepe sa Talisay City, ang duha ilang nailhan base sa impormasyon sa mga una nilang nadakpan.

Sa laing bahin, nadakpan sa kapolisan sa Lapu-Lapu City Police Office City Intelligence Branch ang duha ka gidudahang drug pushers nga silang Arlie Niño Arizo Pahugot  alyas Boy Dagom, 23,  ug Franko Berame Baguio, alyas Tangkoy, 23, diha sa Barangay Calawisan.

Nakuhaan sila og gituohang shabu nga nagkantidad og  P10 mil, P500 nga buy-bust money ug P600 nga gituohang halin niini.

Sa Mandaue City, gidakop ang usa ka 30 anyos nga lalaki ug ang 15 anyos nga dalagita niining uyab sa checkpoint sa mga sakop sa Presinto 1 sa Mandaue City Police Office (MCPO) human nasakmitan og gibanabanang  P100 mil nga gidudahang shabu diha sa dalan  Andres Soriano sa Barangay Centro sa maong dakbayan.

Ang gidakop mao si Carlito Jamili, taga Inayawan, sa Dakbayan sa Sugbo ug ang dalagita. Matud pa nga gisita ang duha tungod kay wala magsuot og helmet ug sa pagrekisa nasakpan ang mga drugas.

Gawas sa duha, duna pay laing siyam ka motorista gihapon ang nadakpan diha sa maong checkpoint tungod sa pagdala og ilegal nga drugas. – IBM, (BANATNEWS)