Tulo na sab patay sa talisay

CEBU, Philippines —  Tulo na usab ka tawo ang nakalas sa Dakbayan sa Talisay sa nagpadayong war on drugs sa gobiyerno kagahapon sa hapon diha sa Sitio Maghaway Proper, Barangay Maghaway sa maong siyudad.

Ang kamatayon sa tulo nadugang sa laing tulo nga napatay gihapon sa kapolisan diha sa maong dakbayan niadtong nakalabay nga Biyernes sa hapon nga nakigpinusilay sa mga polis.  Ang mga nakalas naila nga sila si Susano Labrador, alyas Sano; Vincent Ceballos; ug Warlito Tecson.

"Puro hardcore iyan sa Maghaway... even their families condemn them duon sa area kanina marami nagpasalamat na tao duon," matud pang Supt. Marlu Conag, hepe sa Talisay City Police Station.

Kauban sa operasyon ang grupo sa Regional Special Operation Group 7 Police Supt. Jason Villamater, PPSC 7 2nd PLTN Police Supt Ismael Gauna, RMFB 7 Tanke nga gipangulohan ni Police Chief Inspector Limel Pasquin ug may koordinasyon sa Philippine Drug Enforcement 7 ang maong buy bust operation.

Matud pa ni Conag, dul-an sa usa ka buwan nga gipanid-an ang grupo apan samtang gihimo ang transaksyon, nakabantay sila nga polis ang ilang kasabot ug daling nibunot og mga armas ug nakigpinusilay.

Ang mga backup diha sa perimeter nakigbayloay og bala nga niresulta sa kamatayon sa tulo. Maayo na lang nga walay naigo sa habig sa mga polis.

Atol ning pagsulat nagpadayon pa ang gipahigayon nga inventory sa mga drugas nga nasakmit , drug paraphernalia ug ang upat ka mga armas nga nakuha diha sa crime scene.

Gisusi karon kung ang tulo kagrupo sa tulo usab ka tawo nga napatay sa mga polis sa San Jose Village, Lawaan 3 sa mao gihapong dakbayan niadtong Biyernes sa hapon.

Si Police Senior Supt. Manuel Abrugena, Provincial Director sa Cebu Provincial Police Office nitug-an nga ang namatay sa Lawaan mao ang nakapusil kang Police Officer 1 Jay Taping, atol sa police operations.

Dugang pa ni Abrugena, ang mga namatay sa Lawaan nga sila si Ramonito Manija, Arnel Hernane ug alyas Joseph, nalambigit sa carnaping ug robbery sa Dakbayan sa Talisay ug mga silingan nga lungsod.

Matud pa nga bag-ohay lang nahibaw-an nga top 2 drug suppliers sa Talisay ang tulo human  nga na-neutralized ang ubang dagkong drug personalities sa maong siyudad.

Base sa record sa kapolisan, si Conag miingon nga si Labrador suspek sa duha ka kaso sa pagpatay apil sa mga biktima ang usa ka konsehal, siya usab ang giingong tigpasiugda sa ilegal nga sugal sa maong dapit, gani may mga pasangil nga may mga ginang nga gilugos ang suspek diha sa lugar samtang ang ilang mga bana nanarbaho sa layo. Dugang pa niini, si Labrador mao ang uyoan ni Felix Abacahan nga high value target sa kapolisan tungod sa ilegal nga drugas.

Samtang si Ceballos giingong tigbaligya og shabu ug siga-siga sa ilang dapit ug kusog manghulga niadtong mga silingan nga dudahan niining asset sa mga polis.

Samtang si Tecson sama sab ni Ceballos nga tigbaligya og drugas ug giingong hasta mga kabanay iyang hasion.

Gipangita pa usab ang duha pa nila ka mga kauban nga nakaikyas nga silang   Ariel Olivar alyas Ladoy nga gitumbok nga maoy lider sa ilang grupo ug naila nga bigtime drug pusher sa siyudad.

Siya uab ang gitumbok nga tigsuplay og shabu sa babayeng nadakpan sa Talisay City nga nakuhaan og P10 Milyones nga shabu sa nakalabay nga buwan.

Matud pa ang grupo usab maoy nikontrata og mga hired killers gikan sa Barangay Duljo-Fatima sa Dakbayan sa Sugbo aron hipuson ang mga polis sa Talisay nga nalambigit sa kampanya batok ilegal nga drugas.

Laing gipangita mao si Jackson Segundino nga  usa sa mga hitman sa ilang grupo ug nasulod sa top 5 Most Wanted Person sa maong siyudad ug adunay duha ka warrant of arrest sa kasong pagpatay. – IBM, (BANATNEWS)