20 ka school buildings gipatukod sa Kapitolyo

CEBU, Philippines – Mokabat sa 20 ka school buildings nga langkuban sa 40 ka classrooms ang kasamtangang gitukod karon sa Kapitolyo pinaagi sa Provincial Engineering’s Office diha sa nagkadaiyang eskwelahan sa Lalawigan sa Sugbo.

Base sa report sa engineering office nga 20 ka school buildings ang padayon karon nga gitukod diin ang matag usa niini langkuban sa duha ka classroom nga matag usa usab adunay gilapdon nga 63 square meters.

Ang maong mga school building kasamtangang gitukod diha sa Hawanay Elementary School sa Barangay Tapul, Dakbayan sa  Talisay; Tungkop Elementary School sa  Lungsod sa Minglanilla; Maghanoy Elementary School  ug Mantayupan Elementary School sa Lungsod sa Barili; But-ot  ug Mompeller Elementary School sa Lungsod sa Argao Argao; Ablayan ug Central Elementary School sa Lungsod sa Dalaguete; Nueva Caceres Elementary School sa Lungsod sa Oslob.

Adunay gitukod usab nga school building diha sa Sanlagan National High School sa Lungsod sa Badian; Alangasil ug Balhaan Elementary School sa Lungsod sa Alegria; Victoria ug Gawaygaway Elementary School sa Lungsod sa San Remegio; Cadulawan Elementary School sa Lungsod sa Minglanilla ug Sangat Elementary School sa Lungsod sa San Fernando; Carmen National High School sa Lungsod sa Carmen; Compostela National High School ug Lorenzo C. Tanza Memorial National High School sa San Francisco, Isla sa Camotes.

Matag school building gibana-bana nga moabot ngadto sa P2 milyones ang magasto diin nikabat sa P35.3 milyones ang pundo nga gigahin sa Kapitolyo sa maong mga proyekto.

Matud ni Engineer Hector Jamora nga ang Provincial School Board maoy moila kon asa nga eskwelahan magtukod ang engineering ug school building.

Ang kasamtangang gipangtukod gipaabot kini nga mahuman karong tuiga hangtod sa unang quarter sa tuig 2019. (/BDB)(BANAT NEWS)