12 ka panimaye nameligro sa quarry sa Lagtang

CEBU, Philippines – Moabot na sa 12 ka panimaye sa Sitio Tiguib, Lagtang, Dakbayan sa Talisay ang ipahiluna sa relocation site sa QM Builders.

Kini maoy gibutyag sa tag-iya sa kompaniya nga si Alan Quirante kinsa nagkanayon nga unom ra gyud ka panimaye ang ilang nakita nga direktang maapektuhan kun adunay pagdahili sa yuta apan sa subli nilang pakisusi naabot na kini og 12.

Matud niya nga wala siyay problema sa pagpahiluna sa 12 ka pamilya aron mawagtang sab ang ilang kabalaka.

Ang Provincial Environment and Natural Resources Office (PENRO) nipadayag nga ang ubang panimaye dili na mabalaka tungod kay ang ilang rekomendasyon gibuhat na sa taga QM Builders.

Niadtong Huwebes sa hapon nag-abot ang mga residente sa lugar ug si Cecil Sandalo, consultant sa peace and order sa Talisay City Hall, kinsa nipasabot nga mahimo nang mobalik ang ubang residente base sa pamahayag sa PENRO.

Apan sila si Nora Bacalso nisupak niini kay una nilang nasabutan nga silang tanan hatagan og relocation area.

Nipadayag si Bacalso sa iyang kasagmuyo tungod kay dili si Sandalo ang gusto nilang pakig-estoryahan kun dili si Konsehal Socrates Fernandez nga maoy chairman sa technical committee.

Ang mga residente sa lugar nihiklin sa Tabunok Sports Complex nga moabot na sa halos duha ka buwan apan ang uban nanguli na.

Gipahiluna sa taga QM Builders ang lugar base sa hangyo sa mga residente lakip na ang inadlaw nga pagkaon kanila.

Samtang si Alvin Santillana, pangulo sa Disaster Risk Reduction and Management Office (CDRRMO), niingon nga gawas sa quarry operation nga unang gireklamo sa mga residente naabot na sab sila sa sapa ilabi na kun modaku.

Gibuhat na sab ang bond wall sa taga QM Builders nga mao sab ang rekomendasyon sa PENRO.

Dugang ni Quirante nga andam gyud sila mohatag kun unsa man ang gusto sa mga residente apan kadto lang sab nga tawo nga kinahanglan gyud nga hatagan kay aduna may uban nga mopahimulos lang. (/GMR)(BANAT NEWS)