Pagbanhig kang imok usa ka tuig na

CEBU, Philippines – Kagahapon gihandum ang unang tuig sa pagpatay kang kanhi Ermita barangay kapitan Felicismo “Imok” Rupinta kinsa gibanhigan sa Tayud, Lungsod sa Liloan.

Si Efe Rupinta, anak sa kanhi kapitan, maoy nilingkod isip kasamtangang kapitan sa Ermita, Dakbayan sa Sugbo ug kini niingon nga alas 6 sa buntag kagahapon nag-rosaryo sila sa dapit diin nahitabo ang pagpamanhig.

Human niadto sila sa Queen City Memorial Garden diin gilubong ang kanhi kapitan ug nitambong sila sa Santos nga Misa nga gipahigayon sa maong sam-ang.

Alas 4 sa hapon kagahapon nagpahinungod sab sila og Santos nga Misa sa ilang sports complex ug gisunod dayon ang mini exhibit ug tribute program aron pagpahinumdum sa mga kalampusan nga nahimo ni Imok.

“Aron pagpahinumdom gyud unsa iyang mga achievements isip kapitan ug unsa siya ka maayo aron sad ma-visible sa mga tawo. Iyang mga damgo iya gyud natuman like katong mga titulo sa yuta nga mao gyuy pinakauna niyang damgo sa Barangay Ermita which is natuman gyud iya. Ikaduha ang eskwelahan, ug naa pay ubang daghan,” sigun ni Efe.

Si Efe nagpasalamat sanglit nadakpan ang nipatay sa kanhi kapitan apan kini nitataw nga gusto gyud nila mahibaw-an kun kinsa ang mastermind sa pagpatay sa iyang amahan.

“Ang amo lang gipangayo nga hustiya kay katong kinsay nagsugo gyud kay nakab-ot naman nato ang hustisya kung kinsay nagpatay ang ato nalang is kinsay mastermind, ang bahin sa kaso nagpadagan pa gihapon atong kaso kay February pa ang next hearing pa,” dugang ni Efe.

Samtang si Konsehal Pastor Alcover Jr., kaalyado sa namatay, niasoy nga hangtud karon nagpaabot sila sa hustisya kay wala pa gyud sila nakakita og kahayag sa nahitabo sa kanhi kapitan.

Gihagit sab sa konsehal si Cebu City Mayor Tomas Osmeña nga bakwion ang pamahayag niini nga siya nalipay sa kamatayon ni Imok. (/GMR)(BANAT NEWS)