Polis naangol sa engkwentro

CEBU, Philippines – Nasamdan ang usa ka polis sa pinusilay kagahapon  batok sa mga suspek nga giingong kagrupo niadtong mga kalalakin-ang gipang-salvage didto sa Dakbayan sa Toledo pipila ka semana na ang nakalabay.

Ang nasamdan mao si Police Officer 1 Jaylord Joseph Taping, sakop sa Talisay City Police Station kinsa naigo sa wala niyang dughan dihang nagkapinusilay sa Sitio Mananga 2, Barangay Tabunok kagahapon sa kadlawon.

Ang mga suspek nailhan nga sila si Rolando Valdez alyas Lando, ug duha niini ka mga kaubang naila sa mga alyas nga Dugyot ug Alvin.

Si Supt. Marlu Conag, hepe sa Talisay City Police Station niingon nga nagpahigayon og surveillance ang iyang mga sakop sa lugar kauban ni PO1 Taping apan pag-abot palang nila sa dapit daw nailhan dayon sila sa mga suspek ug si Valdez gikatahong diretsong namusil kanila.

Wala makaigo sa unang pagpabuto ang hinungdan nga nagkasinukliay pa sila og bala nga nilanat og 15 minutos. Asoy pa ni Conag nga wala dayon makabantay si Taping nga nasamdan kini hangtud nga nabati niini ang pagpamanhod sa iyang dughan.

Gidala na dayon siya sa iyang mga kauban sa Talisay City District Hospital samtang nakaikyas ang mga suspek sa kabalayan.

Matud pa ni Conag nga ang mga suspek nagbalik-balik na sa prisuhan sa nagkalain-laing kaso ug kagrupo sila sa duha ka mga tawong gipasanginlang mga carnappers nga napalgang patay didto sa Dakbayan sa Toledo sa miaging buwan.

Nibisita gilayon si Sr. Supt. Manuel Abrugena, direktor sa Cebu Provincial Police Office (CPPO) ngadto sa tambalanan aron kumustahon si Taping.

Samtang si Chief Supt. Debold Sinas, direktor sa Police Regional Office (PRO-7) nimando pagpabalhin sa komportableng tambalanan ni PO1 Taping.

Kagahapon sa hapon, gitauran og Medalya ng Sugatang Magiting nila ni Sinas ug Abrugena si PO1 Taping.

Ang PRO-7 usab maoy moabaga sa gastos sa tambalanan sa maong polis ug hatagan og panahon nga makabawi ayha pa tugotan nga makabalik og trabaho.

Nagtuo sila si Supt. Conag nga ang gigamit sa suspek sa pagpusil nga maoy nakita sa mga operatiba mao ang .45 nga armas nga mao sab ang gibitbit ni Valdez sa iyang pagpahulagway nga na post sa iyang Facebook.

Gawas sa maong hitabo, aduna’y usa ka Manolio Abe, 46, ug tulo ka menor de edad nga gidala sa kapulisan human sila nakuhaan og ilegal nga drugas ug nasuta nga diha sa balay ni Abe unang nanago ang mga suspek. (/IBM)(BANAT NEWS)