Bata patay sa atabay

CEBU, Philippines — Patay ang usa ka 2-anyos nga batang lalaki human natagak sa atabay didto sa Sitio Asan, Barangay Poblacion, Dakbayan sa Talisay kagahapon sa udto.

Ang bata nailhan nga si Rayven Vellita, nagpuyo sa maong dapit. Si Darvis Cañon, silingan sa bata niingon nga magkawos unta siya og tubig sa kumon nga atabay sa ilang lugar apan nakurat siya sa pagkakita sa bata diha sa ilawom nga wala na maglihok.

Dali niya kining gitabang kay makab-ot raman ang bata kay anaa ra man kini sa usa ka dupa og tunga ang gilawmon. Apan pagkuha niini sa bata wala na kini panimuot.

Ang inahan sa bata nga si Karen Kaye Vellita nagkanayon nga ikapito niya nga anak ang namatay.

Sa wa pa kini nahitabo iya kining gipabantayan sa ulitawo na niya’ng anak apan ang maguwang nalingaw sa pagtan-aw sa duwa sa volleyball hangtud nga ang bata nilakaw ug naabot sa maong atabay.

Ilang gituohan nga nagduwa sa timba ang bata diha sa tabay hangtud nga kini natagak sa ubos.

Samtang ang amahan sa bata nga Wilven Vellita dali nga midala sa iyang anak sa Talisay City District Hospital apan matud pa niya sa iyang pagbalik sa ilahang balay nakabsan gyud sa kinabuhi ang ilang anak.

Ang amahan sa bata naabtan sa Banat News diha sa barangay hall nga nagpatabang pinansyal aron mapahiluna og hipos ang anak. - IBM/(BANAT NEWS)