P39M shabu nasakmit
CEBU, Philippines — Mokabat P39 milyones nga balor sa gituohang tulo ka kilong shabu ang nasakmit gikan sa usa ka 25-anyos nga lalaki atol sa gipahigayon nga buy bust operation sa mga sakop sa Pardo Police Station ug Punta Princesa Police Station sa Sitio Caimito, Barangay Tisa sa Dakbayan sa Sugbo kagahapon sa kaadlawon.
Ang nasikop mao si Jeffrey Jade Cabaron, 25, walay trabaho, residente sa Barangay Pasil ning siyudad.
Nangulo sa maong operation mao si Police Chief Inspector Regino Maramag, hepe sa Pardo Police Station uban sa operatiba sa Punta Princesa Police Station.
Nipahigayon ug buy bust ang kapulisan human nagpositibo ang pagpalit sa ilang poseur buyer nga usa usab ka polis diha kang Cabaron.
Si Maramag nagkanayon nga nabisto si Cabaron sa iyang operasyon tungod gihapon sa mga drug suspects nga una na nilang nangadakpan kay sila pulos mitug-an nga gikan kaniya ang ilegal nga drugas nga nasakmit gikan kanila..
“May mga consolidated na intelligence information natin na tumutumbok sa pangalan niya, and nagsimula ang surveillance natin mga three months na talagang magalaw siya (Cabaron),” matud pang Maramag.
Mitug-an si Cabaron nga dili tinuod nga tulo ka buwan na siyang namaligya kay matud niya usa pa lang ka buwan siya nisulod sa maong negosyo. Matud niya adunay tawong wala niya pangalani nga tighatud og drugas nga iyang ibaligya. Wala usab siya motug-an kon kang kinsa kini gikan.
Si Senior Superintendent Royina Garma, director sa Cebu City Police Office miingon nga idlas si Cabaron kay magsige lang kini og balhin-balhin og dapit.
“Ganyan talaga kapag may illegal na ginagawa palipat-lipat ng bahay, kaya this time nung mas nagkaroon na ng traces sa gawa niya nag-operate na agad ang team,” matud ni Garma.
Nasakmit gikan kang Cabaron ang mga gipanghigtan nga pinutos sa ginadili nga drugas nga motimbang og 3.3 kilos.
Ang dinakpan nagtingkagol na karon ug pasakaan og kasong kalapasan sa Section 5 ug Section 11 sa Republic Act 9165.
Ang kapulisan miingon nga kini na ang labing dako nga illegal drugs sa usa lang ka operasyon nga ilang nasakmit karong tuiga. (BANAT NEWS)
- Latest