Padre de pamilya nang-hostage
CEBU, Philippines — Nagtingkagol karon sa lock-up jail ang usa ka padre de pamilya human kini nang-hostage sa iyang pamilya diha sa Sitio Caduloy, Barangay Tisa ning Dakbayan sa Sugbo, alas-6:20 sa gabii niadtong Sabado.
Ang suspek kinsa nasikop sa kapolisan human sa negosasyon mao si Elland Sisiban, 35. Ang iyang gi-hostage mao ang iyang asawa ug duh aka mga gagmay nga mga anak nga diin ang usa may kakulian sa panglawas ug hasta iyang inahan nga si Cresencia,64.
Sa sayo pa niana, nisulod sa balay nila ni Michael Marson nga tagiya sa ilang giabangang balay nga iya ra usab paryente ug gikalalis kini.
Matud pa nga nagdala og kutsilyo si Sisiban ug sa dihang nisulod ang asawa niini aron unta kini pakalmahon nisamot kini og kasuko ug gi-hostage na hinuon ang iyang pamilya.
Sa dihang misulod ang iyang inahan aron unta motabang pagalam-alam kaniya, hasta kini gidid-an na niya nga makagawas. Ang suspek nanghangyo pa sa kapolisan og media coverage ug ingon man sigarilyo.
Ang mga sakop sa Police Station 10 pinangulohan ni Police Chief Inspector Keith Andaya, ug si Kapitan Philip Zafra daling miresponde sa dapit ug mitabang aron makagawas ang mga biktima. Atol sa negosasyon nagsige kini og ingon nga adunay tawong buot mopatay kaniya. Paglabay sa duha ka oras, nakahigayon ang mga otoridad paglipat kaniya ug nasalbar ang mga biktima.
Matud pa sa asawa ni Sisiban nga nagumon ang bana sa ilegal nga drugas ug kanunay kining mag-wild kon dili makasuyop. (BANAT NEWS)
- Latest