Budget sa TCPS doblehon sa sunod tuig

CEBU, Philippines — Gikatakdang usbawan og katunga ang budget alang sa kapolisan sa Siyudad sa Talisay sa sunod tuig.

Kini maoy gitug-an ni Chief Inspector Ardeolito Cabagnot, deputy chief sa Talisay City Police Station.

Si Cabagnot maoy nipresentar sa kapolisan sa gipahigayon nga deliberasyon sa konseho sa maong siyudad.

Karong tuiga ang siyudad nigahin og P3 milyones alang sa kapolisan ug sa sunod tuig gikatakdang himuon kining P6 milyones.

Gihangop ni Cabagnot nga wala nipakita og pagsupak ang konseho sa iyang sugyot sa ilang panginahanglanon sa inadlaw nila nga gimbuhaton.

Matud ni Cabagnot nga kong wala nay kausaban prayoridad nila ang pagtukod og police sub-station diha sa Barangay Tabunok ingon man diha sa Cebu South Coastal Road (CSCR).

Ug gilauman nga mapadali pa unya ang pagresponde sa kapolisan sa matag alarma kun matuman ang tanan nilang mga plano.

Gawas sa sub-station tumong usab nila nga mabag-o o madugangan ang ilang hand held radio, vest, armas, patrol boat nga magamit sa pag-roving diha sa kadagatan sa siyudad. (/BDB)(BANATNEWS)