Kapolisan wala pa sa ¼ sa pagsumpo sa ilegal nga drugas
CEBU, Philippines — Ang hepe sa Cebu City Police Office (CCPO), Police Superintendent Royina Garma nangangkon nga wala pa sila maka ¼ sa ilang kampaniya batok sa ilegal nga drugas.
Matud pa ni Garma nga bisan sa subsub nilang kampaniya batok sa ilegal nga drugas ug minilyon na nga kantidad ang ilang nasakmit apan wala pa sila makaabot ug ¼ sa pagpuhag sa maong problema.
Kini ang gibutyag ni Garma atol sa ilang tigom tali ni Chief PNP Oscar Albayalde kauban ang mga opisyal sa kapolisan sa tibuok rehiyon.
Atol sa maong tigom giingong gipangutana sa Chief PNP ang maong mga opisyal nga nitambong kinsa kasagaran kanila ang nangangkon nga wala pa sila ka ¼ sa ilang kampaniya tungod sa kadako sa problema sa ginadiling drugas.
Matud ni Garma nga minilyon ang kantidad sa ginadiling drugas nga ilang mga nasakmit matag semana apan padayon gihapon ang maong problema hinungdan nga niawhag siya sa katawhan nga tabangan usab sila.
Si Garma nanghinaot nga makigtambayayong kanunay ang mga opisyal sa barangay ilabi na nga sila ang mga nasayod kong kinsa ang mga nalambigit sa ilegal nga kalihukan diha sa ilang lugar. (/BDB)(BANATNEWS)
- Latest