Barangay kapitan nag-refill og LPG sa butane canister gisikop

CEBU, Philippines – Arestado ang usa ka barangay kapitan tungod sa pagpamaligya ug pag refill sa mga iglalabay na untang mga butane canister nga gisudlan og liquefied petroleum gas diha sa Purok Sambag, Barangay Victoria, San Remigio. Ang nasikop mao si Immie Luyao Sipalay, 43, barangay kapitan sa maong dapit ug residente sa maong purok.

Usa ka joint operation ang gihimo sa pagimplementar sa search warrant nga gipangulohan ni Police Chief Inspector William Homoc ug mga sakop sa Bureau of Fire Protection. Ang search warrant giluwatan ni Executive Judge Ruben Altubar sa RTC Branch 29 Toledo City batok kang Sipalay tungod sa report nga nalambigit kini sa pagpamaligya sa maong gidili nga matang sa gamit pagluto.

Ang nakuhang mga ebidensya gikan kang Sipalay mao ang duha ka basiyo sa tangke LPG nga adunay 50kgs capacity, duha ka timbangan, unom ka improvised canister refilling machine, siyam refilled canister sa LPG, 3 1/2 sako sa mga basiyo sa butane canisters ug mga  hiraminta nga gamiton sa refilling operation.

Ang dinakpan ug ang mga ebidensya nga nasakmit anaa na karon sa police station ug giandam na usab ang ipasakang kaso nga kalapasan sa Sec. 2 (a), 3(A), 3(c), 3(e) of P.D. 1865. (/IBM)(BANAT NEWS)