200 ka manindahay naninda sa night market

CEBU, Philippines – Nikabat ngadto sa 200 ka small scale entrepreneurs ang nagsugod na og paninda sa night market diha sa mga dalan Legaspi ug Pelaez human sila nakatuman sa tanang mga gikinahanglan nga dokumento nga gipangayo sa kagamhanan sa Siyudad sa Sugbo.

Ang operations head sa Division for the Welfare of the Urban Poor (DWUP) Genevieve Alcoseba nagkanayon nga gitugotan nila ang mga manindahay nga makabaligya sa ilang produkto panahon sa kagabhion human sila nakatuman sa mga rekisitos.

Sugod kagabii hangtod sa Marso tuig 2019 ang mga manindahay tugotan nga mo-display sa ilang produkto diha sa identified streets panahon sa gabii.

Matag tuig ang mga manindahay makita diha sa kadalanan nga nagtanyag og mga baratong mga baligya.

Sa dili pa pormal nga pagbukas sa night market ang mga manindahay nikuha kini og permit gikan sa DWUP nga naghatag nila og oportunidad nga makabaligya sa maong mga dapit.

Matud ni Alcoseba nga nagkalain-laing dry goods ang makita diha sa dalan Legaspi ingon man mga pagkaon sa Pelaez Street.

Mga 140 ka vendor ang nahimutang diha sa Legaspi Street diin magbayad sila P2,250 ug P1,500 sa mga vendor sa Pelaez Street diin gitagana kini alang sa bayranan sa kuryente, cleaners, marshall ug uban pa.

Kahinomduman nga ang night market diha sa dalan Colon gipahimutang kaniadto apan gumikan sa kahuot sa trapiko gibalhin kini sa siyudad diha sa nahisgutang mga dapit.

Matud usab ni Alcoseba nga gi-organized nila ang mga vendor aron dili makamugna og kahuot sa dagan sa trapiko sa downtown area.

Ang team sa DWUP mopahigayon og surprise inspection sa lugar aron masiguro nga hapsay ug malinawon ang operasyon. (/BDB)(BANAT NEWS)