Polis gipusil patay
CEBU, Philippines – Patay ang usa ka polis human gipusil sa wala ilhing mamumuno sa karsada sa Barangay Calajoan, Minglanilla kagahapon sa alas 10:45 sa buntag.
Ang biktima nailhan nga si PO2 Lord Romyth Cañada, 38, taga Sitio Bacay, Barangay Tulay sa maong lungsod, samtang ang bayaw niini nga si Ken Echavez, 36, nakaangkon lang og garas sa iyang kilid ug bukton atol sa pagpamusil.
Sa inisyal nga imbestigasyon sa kapolisan nasuta nga nagpaayo sa iyang sakyanan ang biktima dihang kalit naabot ang itom nga sakyanan nga gisakyan sa mamumuno.
Wala’y daghang estorya gibirahan makadaghang higayon ang biktima.
Si PO2 George Tapales sa Minglanilla Police Station nagkanayon nga nadestino ang biktima kaniadto sa Minglanilla apan gibalhin niadtong 2016 sa Police Regional Office 7.
Pipila ka residente nga nakasaksi niasoy nga gikaestorya pa ang biktima nga nagpakiluoy sa mamumuno apan nisunod na dayon ang sunod-sunod nga buto sa armas.
Kapin sa 10 ka kabhang sa bala sa .9mm ug caliber .45 nga armas ang nasakmit gikan sa crime scene.
Ang tigpamaba sa Cebu Provincial Police Office nga si Supt. Janette Rafter nagkanayon nga si Cañada nalakip sa first wave nga gipangrelibohan sa wala masayri nga rason dihang nilingkod si Presidente Rodrigo Duterte niadtong tuig 2016
Wala sab sa listahan ni Duterte ang pangan sa maong polis nga giingong apil sa ilegal nga drugas. - Rowena D. Capistrano ug Camille L. Pateres/GMR (BANAT NEWS)
- Latest