Lima sikop sa Oplan Limpiyo sa Danao
CEBU, Philippines — Lima ka tawo sikop atol sa gipahigayong Oplan Limpiyo sa kapolisan sa Dakbayan sa Danao diha sa managlahing lugar ug oras kagahapon.
Unang operasyon diha sa Sitio Lupot, Barangay Sabang kagahapon sa kadlawon diin nasikop sila si Sanny Alcantara, 34-anyos, ulitawo, walay trabaho ug Erwin Ruta, 24, taga Sitio Canlingo sa maong Dakbayan.
Nasakmit gikan sa mga suspetsado ang mga pinutos nga shabu nga motimbang tanan ngadto sa 5.4 gramos nga mobalor og P64 mil base sa Dangerous Drugs Board Value, buy-bust money ug P400 nga gituohang halin sa ginadiling drugas.
Nangulo sa maong operasyon si Police Superintendent Jaime Quicho uban ang Danao City Police Station Drug Enforcement Unit, Intel Operative ug pagpakig-alayon usab sa Philippine Drug Enforcement Agency.
Ikaduhang operasyon gipahigayon diha sa Sitio Canlingo, Barangay Sabang ug nasikop si Marites Laude, 45-anyos, walay trabaho, subject sa buy-bust ug Rufiniano Cui, 63-anyos parehong residente sa maong lugar.
Nasakmit gikan kanila ang 10 ka gagmay’ng pakete sa shabu nga mobalor ngadto sa P6,500, P500 nga giingong halin ug P200 na buy-bust money.
Laing nasikop diha sa Bonifacio extension, Barangay Poblacion sa maong dakbayan si Archier Mojada, 32-anyos, minyo, walay trabaho.
Nakonpiska gikan kang Mojada ang drugas nga nitimbang og 5.35 gramos nga mobalor ug P63 mil base sa Dangerous Drug Board Value, buy-bust money ug P200 nga gituohang halin.
Ang mga suspetsado nagtingkagol diha sa detention cell sa Danao City Police Station. -/BDB (BANATNEWS)
- Latest