Taga BPO, uyab nag- atubang og kaso
CEBU, Philippines — Nag-atubang og upat ka kasong pagpangawat ang kanhi opisyal, kawani ug uyab sa langyaw nga nagdumala og business process outsourcing (BPO) sa Mandaue City Regional Trial Court.
Ang mga akusado giila nga sila si Bethany Melienche Ramos, 30, taga Upper Pakigne, Minglanilla; Ana Loreta Andrada, 26, taga Cabangahan, Consolacion ug Janet Machica, 37, taga Makati City. Si Ramos kanhi sakop sa Board of Directors ug si Andrada kawani sa PANSSAM, Inc. sa Banilad, Mandaue City samtang si Machica ang kanhi uyab sa French nga si David Chetrit, ang majority stockholder ug presidente sa kompaniya.
Sila si Ramos ug Andrada ang nakabutang na og piyansa nga tag P260,000 matag usa niadtong Oktubre 31, 2018 samtang si Machica ang adunay upat ka warrant of arrest nga giisyu ni RTC 7 Branch 28 Assisting Judge Allan Francisco Garciano nga gipetsahan og Oktubre 24, 2018.
Si Chetrit nisang-at og reklamo sa giingong panagkunsabo sa tulo ka akusado sa pagbalhin sa kwarta sa kompaniya sa ilang personal nga bank account sa kantidad nga $52,582.72 kon mokabat sa P2 milyones.
Matud ni Chetrit nga kini nahitabo niadtong Nobiyembre ug Disyembre 2012 samtang didto siya sa Canada gikan sa Septiyembre 19, 2012 hangtud Marso 19, 2013 apan iyang nadiskubrehan niadto lang Abril 2017.
Niadtong Hulyo 10, 2018, si Assistant Mandaue City Prosecutor Mary Francis Daquipil nirekomendar sa pagpasaka sa upat ka kasong qualified theft batok sa tulo ka akusado ug giaprobahan ni Acting City Prosecutor Marites Banzali-Cullen hinungdan nga napasaka gyud ngadto sa korte ang kaso.
Matud ni Daquipil nga giabusaran lang sa mga akusado ang pagsalig ni Chetrit ngadto kanila hinungdan nga nahimo ang krimen.
Nasayran nga si Ramos ang nipirma sa bank account sa PANSSAM, Inc., ug si Andrada ang giingong naghimo sa request cash disbursement hinungdan nga ang kwarta sa kompaniya nabalhin sa joint ug personal accounts nilang Ramos ug Machica. (BANATNEWS)
- Latest
