Supply sa insulin sa DOH makibhangan
CEBU, Philippines — Pagpangapod-apod og libreng insulin sa Department of Health sunod tuig hayan makibhangan tungod sa pakyas nga bidding sa kaulohan.
Kini ang gitug-an ni Lourdes Maratas, Pharmacist III sa DOH-7, nga nahinabi sa Banat News.
Matud ni Maratas nga karong tuiga gisugdan nila ang pagpangapod-apod og libreng insulin sa mga diabetic nga tawo sa Provincial Health Office diin ubay-ubay na ang nakapahimulos sa programa.
Sumala pa ni Maratas nga adunay tulo ka klase ang insulin diin adunay usa niini ang out of stock na tungod kay maoy kasagaran nga gamiton.
Gitug-an ni Maratas nga sila sa DOH mohimo gihapon og procurement sa maong mga insulin nga ipangapod-apod sa mga hospital nga ubos sa DOH sama sa Vicente Sotto Memorial Medical Center, Eversly Hospital, Gallares Hospital ug uban pa.
Sumala pa ni Maratas nga mahimo sab nga ang mga local government units mopalit sa maong insulin aron aduna silay magamit sa ilang komunidad. -/GMR (BANATNEWS)
- Latest
