2019 budget sa elektrisidad sa CCMC padak-an

CEBU, Philippines — Nangayo ang Cebu City Medical Center (CCMC) og P13 million alang sa electricity consumption alang sa 2019 nga budget sa siyudad diin taas kini og P5 million itandi sa budget karong tuiga.

Niadtong Lunes, si CCMC Administrator Kenneth Siasar nisulti sa committee on budget and finance sa konseho sa siyudad nga ang pagpadaku sa electricity budget pagpangandam kini sa pagbukas sa unang tulo ka andana sa bag-ong building sa Marso 2019.

Karong tuiga ang CCMC dunay approved budget nga P8 million diin susamang kantidad kini sa 2017.

Matud niya nga sa nilabay nga katuigan hingpit nilang nagamit ang P8 million budget.

Ang budget sa elektrisidad alang sa operasyon sunod tuig usa sa daku nga item nga apil sa proposed annual budget sa CCMC.

Sa kasamtangan, ang first phase sa bag-ong building 91 porsyento na nga kompleto.

Ang 10-storey CCMC building nahimutang sa Natalio Bacalso Avenue ug eskina sa Panganiban Street.

Sukad niadtong Oktubre 2013 dihang ang karaang building naigo sa kusog nga linog, ang CCMC temporaryong niokupar sa compound sa Bureau of Fire Protection (BFP).

Sigun ni Siasar nga on-time ang kontraktor sa pag-ugmad sa tambalanan hinungdan nga ilang napanglantawan nga ang unang tulo ka andana operational na sa buwan sa Marso sunod tuig.

Dugang niini nga sa dili pa nila magamit ang tulo ka andana, mokuha una sila og accreditation sa Department of Health (DOH). Sa unang andana ipahimutang ang parking, septage treatment, laundry area ingon man ang maintenance; sa second floor makita ang emergency room ug departments lakip na ang pedia, internal medicine, surgery, isolation room ug organ imaging.

Sa third floor diha ang out-patient department, dialysis department, hematology ug oncology department.

Asoy ni Siasar nga ang Department of Engineering and Public Works (DEPW) nahuman na sa Program of Works and Estimates (POWE) sa phase 2 sa proyekto.

Nunot niini, nag-andam na sila sa ubang dokumento nga gikinahanglan aron ang kontraktor makapadayon sa konstruksiyon sanglit negotiated procurement man kini.

Sa 2019 ang CCMC nangayo og P368 million annual budget diin taas kini og P50 million sa appropriation karong tuiga nga naglangkub sa maintenance, laboratory supplies ug uban pa.

Ang CCMC maoy katapusang item nga gituki sa komitiba niadtong Lunes.

Sunod semana ang komitiba gilauman nga mohatag og report sa konseho sa siyudad sa proposed P8.1 billion budget alang sa 2019. -/GMR (BANATNEWS)