Department heads sa Talisay nabalik sa kanhi posisyon

CEBU, Philippines — Hingpit na nga gibiyaan sa kasamtangang city engineer Gamaliel Vicente Jr. sa Siyudad sa Talisay ang iyang katungdanan sugod karong buwana.

Kini human si Vicente natudlo na nga direktor sa Technical Education Skills Development Authority (TESDA) ngadto sa laing rehiyon. Si Vicente kinsa nagserbisyo sa siyudad sulod sa 15 katuig gipasalamatan kini ni Mayor Eduardo Gullas ug sa konseho tungod sa mga proyekto nga napatuman.

Gumikan niini si Engineer Audie Bacasmas ang nabalik sa iyang posisyon isip city engineer sa dakbayan samtang si Engineer Christine Homez kinsa nabalhin sa Solid Waste Management Office ang nabalik usab sa posisyon isip pangulo sa City Planning Office. Si Bacasmas nagkanayon nga iyang ipadayon ang nasugdan nga mga proyekto sa dakbayan ubos sa liderato ni Gullas ingon man sa panahon ni Vicente.

Ilabi na nga sa sunod tuig nga budget sa siyudad ang gihatagan og prayoridad sa opisyales mao ang infrastructure project.

Sa nasayran nga si Bacasmas mao ang city engineer sa dakbayan apan nabalhin kini tungod sa nahitabong lahugay ubos sa administrasyon ni Gullas. (BANAT NEWS)