PRO-7 swat ika-9 tibuok nasud

CEBU, Philippines — Gipasidunggan isip labing malambuon nga Special Weapons and Tactics (SWAT) Team sa Police Regional Office 7 sa tibuok nasud human sa malampuson nga sangka sa Davao City sa niaging semana.

Mapasigarbuhon nga gipresentar ni Chief Superintendent Debold Sinas, direktor sa PRO-7, ang SWAT Team human nakab-ot niini ang ika-siyam nga pwesto sa 50 ka teams nga niapil.

“At least we have become a team to be reckoned with. Naa napilde specialized teams, out of the region, kami number 3 nga nisulod sa top 10,” matud ni Sinas.

Daku kini nga layat gikan sa ika-49 sa niaging tuig. Nunot niini matud ni Sinas nga dili na niya bungkagon ang SWAT Team ug opisyal na silang kuhaon gikan sa tagsa-tagsa ka mother unit aron magpadayon sa ilang training.

Sila na sab ang magpasiugda sa competency trainings sa ubang kapolisan ilabi na sa pagkupot og pusil.

Si Sinas niingon nga ang SWAT Team sa PRO-7 mao ang labing labaw nga SWAT tungod sa exposures niini sa training.

I-deploy lang sila sa mga dagku nga kalihukan ug emergency situation. (BANAT NEWS)